Նիկոլ Փաշինյանի հեռանալն այլընտրանք չունի, և բնավ ոչ այն պատճառով, որ դա մենք, մեր քաղաքական համախոսհներն են ցանկանում, ամենայն հայոց կաթողիկոսները, նախագահները, մտավորականները, գիտնականները, երաժիշտները, ՀՀ քաղաքացիները։ Խնդիրն անգամ բարոյական տիրույթից էլ դուրս է։ Այս մասին Նիկոլ Փաշինյանի հրաժարականի պահանջով «Արժանապատվության երթի» ընթացքում հայտարարեց ԱԺ «Բարգավաճ Հայաստան» խմբակցության պատգամավոր Շաքե Իսայանը։

«Խնդիրը շատ խիստ է՝ Նիկոլ Փաշինյանը պետք է գնա, որ ՀՀ-ին տրվի նոր շանս՝ երկրի անվտանգությունը կազմակերպելու համար, լիարժեք վերականգնելու ռազմավարական դաշնակիցների հետ հարաբերությունները և դառնալու վստահելի գործընկեր, նոր շանս՝ համախմբվելու, քաղաքացիական համերաշխությունը վերականգնելու համար։ Նոր շանս՝ ՀՀ-ի և Արցախի արժանապատվությունն  ու դեմքը փրկելու համար»,-ասաց պատգամավորը։

Նա նշեց՝ այսօր առավել, քան երբևէ ՀՀ-ի և ԱՀ-ի պատիվը քաղաքացիներ ձեռքերում է։

«Մենք չենք հանդուրժելու անպատիվ ղեկավարին ու նրա անպատիվ քաղաքականությունը, ուստի միացեք պետականաշեն առաքելությանը։ Բոլորս ունենք մեկ առաքելություն՝ ՀՀ-ի և ԱՀ-ի ապագան։ ՀՀ քաղաքացիները պետք է ունենան այդ ապագան, և այն պետք է լինի արժանապատիվ։ Պարտված ղեկավարն այս ամենը չի կարող անել, ուստի, այլ շանս չի մնում, քան Նիկոլ Փաշինյանին հեռացնելը»,-ասաց Շաքե Իսայանը։

Հիշեցնենք, որ այսօր քաղաքացիների «արժանապատվության երթ» երթը մեկնարկել է «Թումո»–ի այգու մոտից։