Համացանցում տարածվող տեսանյութը, թե իբր 62 նոր զինծառայող է գերեվարվել, չի համապատասխանում իրականությանը, այս մասին Tert.am-ի հետ զրույցում ասաց ՊԲ խոսնակ Սուրեն Սարումյանը:

«Այդ տեսանյութը հին է, վերջին օրերին Խծաբերդի ու Հին թաղեր հատվածի այդ ցավալի դեպքից հետո այլևս որևէ զինծառայողի գերեվարման փաստ չի արձանագրվել: Նշում են, թե ևս 62 զինծառայող են գերեվարել, զինծառայողները պարզ է՝ երևում են, բայց սուտն այն է, որ ներկայացնում են, թե նոր է եղել, այդպես չէ»,- ասաց նա:

Սարումյանը ևս մեկ անգամ շեշտեց, որ Խծաբերդ, Հին թաղեր հատվածում տեղի ունեցած ցավալի դեպքից հետո, որի մասին հայտարարել են, որևէ զինծառայողի գերեվարում չի եղել:

Նշենք, որ համացանցում սկսվել է շրջանառվել մի տեսանյութ, որում նշվում է, թե ադրբեջանական բանակը գերեվարել է 62 հայ զինծառայողի:

Հիշեցնենք, որ ՊԲ-ն դեկտեմբերի 16-ին հայտարարություն էր տարածել, որ դեկտեմբերի 15-ի երեկոյան, դեռևս անհայտ պայմաններում, կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ և որ ռուսական խաղաղապահ զորախմբի միջնորդությամբ գործուն քայլեր են իրականացվում պարզելու հայ զինվորականների գերեվարման հավանականությունը:

Ապա, ԱՀ պաշտպանության նախարարությունը հայտնել էր, որ նշված ուղղությունում դեռևս շարունակում է անհայտ մնալ 73 մարդու ճակատագիր: Խնդիրը տեղում ուսումնասիրելու և անհրաժեշտ գործողություններ ձեռնարկելու նպատակով Արցախի Հանրապետություն է մեկնել նաև ՀՀ ԶՈՒ ԳՇ պետ, գեներալ-գնդապետ Օնիկ Գասպարյանը։