ԱՀԿ-ն մեկնաբանել է Մեծ Բրիտանիայում հայտնաբերված կորոնավիրուսի նոր շտամի մասին հաղորդագրությունները:
Կազմակերպությունում ընդգծել են, որ սերտորեն շփվում են Լոնդոնի հետ։ Բրիտանացի մասնագետները ԱՀԿ-ի հետ կիսում են վերլուծության և ընթացիկ հետազոտությունների արդյունքները։

«Մենք անդամ պետություններին և հանրությանը կտեղեկացնենք այնքանով, որքանով ավելի շատ կիմանանք այդ տեսակի վիրուսի բնութագրերի և ցանկացած հետևանքների մասին»,- Twitter-ում հայտնել է ԱՀԿ-ն:

Ավելի վաղ Մեծ Բրիտանիայում հաստատել են, որ կորոնավիրուսի նոր տեսակը, որը հայտնաբերվել է երկրում, կարող է 70 տոկոսով ավելի վարակիչ լինել, քան սովորականը եւ բնակչությունից ավելի մեծ զգուշություն է պահանջում: Ընդ որում, նշվում է, որ ոչինչ չի մատնանշում մահացության կամ հոսպիտալացման տեսանկյունից նրա մեծ վտանգը:

Շաբաթ օրը վարչապետ Բորիս Ջոնսոնը հայտարարել է Լոնդոնում և Անգլիայի հարավ-արևելքի տարածաշրջաններում նոր սահմանափակումներ մտցնելու մասին, որոնք, նրա խոսքերով, ըստ էության, նշանակում են լոքդաուն: Միջոցառումների խստացման մասին Անգլիայից հետո հայտարարել են նաև Շոտլանդիայի և Ուելսի իշխանությունները:

Բրիտանիայում կորոնավիրուսի համաճարակի սկզբից ի վեր հաստատվել է 2 004 219 հիվանդացության դեպք, մահացել է 67 075 հիվանդ: