Ֆրանսիայի Բուլոն-սյուր-Մեր քաղաքի քաղաքապետ Ֆրեդերիկ Կյուվիլիեն Մեծ Բրիտանիային սպառնացել է «Ֆոլկլենդյան պատերազմով»՝ Եվրամիության հետ ձկնորսության շուրջ ծագած վիճաբանության պատճառով:

Ինչպես հայտնում է РИА Новости-ն՝ հղում անելով բրիտանական աղբյուրին, Բրյուսելը պնդում է, որ Brexit-ից հետո իր ձկնորսական նավերը պետք է հասանելիություն ունենան դեպի բրիտանական ջրեր, սակայն Լոնդոնը ցանկանում է պահպանել ինքնիշխանությունն այդ տարածքներում և դրանք դարձնել Միացյալ Թագավորության օգտագործման բացառիկ գոտի:

Մեծ Բրիտանիան ծրագրում է 4 ռազմանավ ուղարկել իր ձկնորսական նավերը պաշտպանելու համար, եթե ԵՄ-ի հետո նոր գործարք չկնքվի:

Մեկնաբանելով Լոնդոնի դիրքորոշումն այդ հարցով, ֆրանսիական քաղաքի ղեկավարը զգուշացրել է հակամարտության առաջացման սպառնալիքի մասին:

«Դուք իսկապես Ֆոլկլենդյան պատերազմ եք ուզո՞ւմ … Ռազմանավերի մասին զրույցները չեն կարող նպաստել համաձայնության հասնելուն»,- ասել է Կյուվիլիեն:

Ներկա պահին Լոնդոնի և Բրյուսելի միջև առևտրային հարցերի շուրջ բանակցությունները փակուղում են հայտնվել բրիտանական ջրերում ձկնորսության հասանելիության պատճառով:

Ֆոլկլենդյան պատերազմը զինված հակամարտություն էր Մեծ Բրիտանիայի և Արգենտինայի միջև, որը տեղի է ունեցել 1982 թվականին: Պայքարն ընթացել է բրիտանական տարածքների համար Հարավային Ատլանտիկայում: