Կորոնավիրուսի դեմ ռուսական «Սպուտնիկ V» պատվաստանյութն առաջին անգամ պաշտոնապես գրանցվել է այլ երկրում
ՌԴ Գամալեայի անվան համաճարակաբանության և հետազոտությունների կենտրոնի մշակած «Սպուտնիկ V» պատվաստանյութը կորոնավիրուսի դեմ գրանցվել է նաև Բելառուսում: РБК-ի փոխանցմամբ՝ այս մասին տեղեկացրել է «Ռուսական ուղիղ ներդրումներ» հիմնադրամը, որը ֆինանսավորել է պատվատանյութի ստեղծումը:
Պատվաստանյութին գրացման վկայական հատկացնելու մասին հայտնել է նաև Բելառուսի Առողջապահության նախարարությունը:
«Կարող ենք պաշտոնապես հայտարարել, որ այսօր առկա տվյալների համաձայն՝ պատվաստանյութն անվտանգ և արդյունավետ է, լուրջ կամ անկանխատեսելի կողմնակի ազդեցություն չի հայտնաբերվել»,- ասել է Բելառուսի առողջապահության նախարար Դմիտրի Պինևիչը: Նրա խոսքով՝ քաղաքացիների պատվաստումը երկրում կմեկնարկի հունվարին:
Բելառուսը դարձել է առաջին երկիրը, որը մասնակցել է «Սպուտնիկ V» պատվաստանյութի արտասահմանյան կլինիկական ուսումնասիրություններին, ինչպես նաև առաջին երկիրը ՌԴ-ից հետո, որը պաշտոնապես գրանցել է այն:
