Տոկիոյի դատախազության հատուկ քննչական խումբը կամավոր հիմունքներով հարցաքննել է Ճապոնիայի նախկին վարչապետ Սինձո Աբեին և եկել այն եզրակացության, որ ի հեճուկս մամուլի բազմաթիվ հաղորդագրությունների՝ ընտրողներին կաշառելու և քաղաքական հիմնադրամների մասին օրենսդրությունը խախտելու համար հիմքեր չկան նրան մեղադրանքներ առաջադրելու համար, Yomiuri թերթին հղումով գրում է ՏԱՍՍ-ը։

Միևնույն ժամանակ պարզեցված ընթացակարգով մեղադրանք կարող է առաջադրվել նախկին վարչապետի ավագ քարտուղարին: Մասնավորապես, խոսքը 2013-2019 թվականներին Սինձո Աբեի կողմնակիցների համար հյուրանոցներից մեկում ընդունելությունների մասին է։ Պարզվել է, որ նրանց սննդի համար  նախկին վարչապետի միջոցներից առանց պատշաճ փաստաթղթերի 2015 թվականից հատկացվել է առնվազն 40 մլն իեն (ավելի քան 387 հազար դոլար):

Նման վճարումները կարող են գնահատվել որպես օրենքի խախտում և ընտրակաշառք։ Այդ հոդվածով դատապարտյալին սպառնում է մինչև հինգ տարի ազատազրկում կամ մինչև 1 մլն իեն (մոտ 9,7 հազար դոլար) տուգանք: Դատախազությունը եկել է այն եզրակացության, որ Աբեն տեղյակ չի եղել այդ վճարումների մանրամասների մասին։

Ներկայում ընդդիմությունը պահանջում է նախկին վարչապետին կանչել խորհրդարան և պարզել գործի հանգամանքները։