Ադրբեջանի Սոցիալական հետազոտությունների կենտրոնը բնակչության շրջանում հարցում է անցկացրել հայերի և ադրբեջանցիների համատեղ կյանքի և ռազմական գործողությունների վերսկսման հավանականության վերաբերյալ: Հարցմանը մասնակցել է պատահականորեն ընտրված 603 հարցվող:

Ըստ Minval.az-ի՝ բնակչության մեծ մասը (66.2%) կարծում է, որ ադրբեջանցիների և հայերի համատեղ բնակությունը Ղարաբաղում երբեք հնարավոր չի լինի, իսկ 19.4%-ը՝ որ դա հնարավոր կլինի մի քանի տարի անց: Հարցվածների միայն 4.8% -ն է հավատում, որ համատեղ կյանքը հնարավոր է մոտ ապագայում: Կանանց 74.4%-ի կարծիքով՝ ադրբեջանցիների և հայերի համատեղ գոյակցությունն անհնար է, մինչդեռ տղամարդկանց շրջանում այդ ցուցանիշը 58% է: Հարցված տղամարդկանց 25.5%-ը և կանանց 13.3%-ը կարծում են, որ համատեղ կյանքը հնարավոր կլինի մի քանի տարի անց:

Հարցվածների շրջանում հայերի հետ համատեղ կյանքը համարվում են անհնարին հիմնականում երիտասարդները:

Շեքի-Զաքաթալայի և Վերին Ղարաբաղի բնակչության ավելի քան 80.0%-ը դեմ է հայերի հետ համատեղ կյանքին: Ապշերոնի բնակիչների մեծամասնությունը (73,7%) նույն կարծիքին է: Համատեղ կյանքը անհնարին են համարում միջնակարգ կրթություն ունեցողների 75.0%-ը, արհեստագործական ուսումնարանների և քոլեջների շրջանավարտների 71.7%-ը, լրիվ միջնակարգ կրթություն ունեցողների 69.0%-ը և բարձրագույն կրթություն ունեցողների 57.7%-ը: