Գորիսի քաղաքապետ Առուշ Առուշանյանն ազատության մեջ է։

Նա լրագրողների հետ զրույցում հարուցված քրեական գործն իր նկատմամբ քաղաքական հետապնդում համարեց։

Հարցին՝ իր կոչից հետո Նիկոլ Փաշինյանն, այնուամենայնիվ, չկարողացավ մուտք գործել Գորիս, արդյոք դա ինքը հաջողություն որակո՞ւմ է, Առուշանյանն ասաց.

«Դա սյունեցիների կամքն էր։ Այո, այդ մարդն իրավունք չունի մտնել Սյունիք, որովհետեւ սյունեցիների պահած հողը հանձնել է թշնամուն, կոնկրետ Շուռնուխի հատվածը, Որոտանի հատվածը, Խնձորեսկի հատվածը։ Մարզի մնացած համայնքներում էլ կա նույն խնդիրը, ես կոնկրետ Գորիսի մասին ներկայացրի»։

Անդրադառնալով Փաշինյանի այն խոսքին, թե ինքը չգնաց Կապան, Գորիս, Մեղրի քաղաքներ, որ բախումներ չլինեն, սակայն վստահ էր՝ իրեն նույն կերպ են ընդունելու, ինչպես Սիսիանում, Գորիսի քաղաքապետն ասաց. «Ես չեմ տեսել՝ Սիսիանում ոնց են ընդունել»։

Հարցին՝ արդյոք ինքը քրեորեն պատժելի արարք կատարե՞լ է, Առուշանյանն ասաց՝ իհարկե ոչ։

«Հայրենիք է պաշտպանել, հիմա դրա համար դատում են»,- հավելեց նրա պաշտպան Արմեն Մելքոնյանը։

Անդրադառնալով Գորիսում իրեն ազատ արձակելու պահանջով բողոքի ակցիաներին՝ քաղաքապետն ասաց. «Ես սյունեցու նամուս, թասիբի վրա ոչ մի վայրկյան չեմ կասկածել, որ կարող էր այդպես չլինել։ Փառք թասիբով ժողովրդին»։

Նշենք, որ այսօր՝ դեկտեմբերի 22-ին, Երեւան քաղաքի ընդհանուր իրավասության դատարանը, դատավոր Վաչե Մարգարյանի նախագահությամբ, Գորիսի քաղաքապետ Առուշ Առուշանյանի ձերբակալումն ապօրինի եւ ոչ իրավաչափ է ճանաչել։

Այսօր հայտնի դարձավ, որ Գորիսի քաղաքապետ Առուշ Առուշանյանի վերաբերյալ քրեական գործերը նախաքննական մարմնի որոշմամբ միացվել են մեկ վարույթում։ Այդ առնչությամբ Առուշանյանի պաշտպան Արմեն Մելքոնյանը հայտնել էր, որ նախաքննական մարմինը փորձում է մի քանի քրեական գործեր միավորել մեկ վարույթում, որ Առուշանյանին ծանր հոդվածների մեղադրանքով կալանավորելու միջնորդություն ներկայացնեն դատարան։

Հիշեցնենք, որ երեկ՝ դեկտեմբերի 21-ին, ժամը 04։30-ի սահմաններում բերման էր ենթարկվել Գորիսի քաղաքապետ Առուշ Առուշանյանը, որի մասին մի քանի ժամ էր՝ փաստաբանները տեղեկություն չունեին, հայտնի չէր անգամ, թե ինչ քրեական գործով եւ ինչ կարգավիճակով է քաղաքապետը բերման ենթարկվել։

Որոշ ժամանակ անց հայտնի դարձավ, որ Առուշանյանը Երեւանի քննչական կոմիտեում է եւ հարցաքննվում է ապօրինի հավաքներ կազմակերպելու եւ անցկացնելու վերաբերյալ հարուցված քրեական գործով։ Նշենք, որ այսօր նրա ձերբակալման որոշման իրավաչափության դեմ բողոքի մասին դատական նիստն է։

Հիշեցնենք, որ ՀԿԳ քննության գլխավոր վարչության վարույթում են քննվում նաեւ Գորիս համայնքի ղեկավարի կողմից թույլ տրված առերեւույթ հանցագործությունների դեպքերի առթիվ 2019թ. մայիսի 25-ին ՀՀ քրեական օրենսգրքի 178-րդ հոդվածի 3-րդ մասի 1-ին կետով եւ 308-րդ հոդվածի 2-րդ մասով, 2019թ. նոյեմբերի 11-ին ՀՀ քրեական օրենսգրքի 3152-րդ հոդվածով, 2020թ. մարտի 18-ին ՀՀ քրեական օրենսգրքի 133-րդ հոդվածի 2-րդ մասի 7-րդ կետով, 322-րդ հոդվածի 2-րդ մասով հարուցված քրեական գործերը: