Հանրապետության հրապարակում տեղի է ունեցել գողություն, գողոնը՝ այսինքն ժողովրդի վստահությունը, սպասելիքները, ակնկալիքները և ի վերջո իշխանությունը պետք է վերադարձնել ժողովրդին։ Այս մասին Հանրապետության հրապարակում Նիկոլ Փաշինյանի հրաժարականի պահանջով հանրահավաքին հայտարարեց քաղաքագետ Անդրանիկ Թևանյանը:

«Տեղի է ունեցել թալան, գողացել են բյուջետային միջոցները, անունը դրել են պարգևավճար, գողացել են մեր Արցախ հայրենիքը, անունը դրել են մարտավարական նահանջ, եկեք բոլորս  ո՛չ ասենք այդ ստախոս սրիկաներին, որոնք մեզ «հաղթելու ենք» կոչերի ներքո տարան պարտության և կապիտուլյացիայի»,- ասաց նա:

Նա նշեց, որ երկու տարի առաջ  առիթ է ունեցել գրելու, որ Նիկոլ Փաշինյանը իրեն հիշեցնում է տխրահռչակ Գորբաչովին։ «Նա Գորբաչովի նման ստախոս է, Գորբաչովի նման դատարկախոս և պետություն քանդող։ Հիշո՞ւմ եք՝ ինչ էր ասում Գորբաչովը Բաքվի ու Սումգայիթի ջարդերից հետո, դատարկախոսությամբ էր զբաղված։ Իսկ հիշո՞ւմ եք՝ մեր հայազգի պատգամավորը ինչ ասեց նրան։ Ուրեմն ես ձեզ ասեմ Նիկոլ Փաշինյանը ստում է և պարտության է տանում ՀՀ-ն: Մենք բոլորս պետք է մաքրվենք այդ կեղտից, նահանջել չկա, հոգնել չկա, որովհետև նահանջելու հակառակ կողմը պետության կորուստն է, որովհետև հոգնելու հակառակ կողմը թուրքական ներխուժումն է»,- հայտարարեց Թևանանը:

Նա նշեց. «Բոլորս իրար խոստանում ենք՝ մեկ յուրաքանչյուրս վճռական կանգնելու ենք այնքան ժամանակ, մինչև այդ ստախոսին, այդ կապիտուլյանտին չքշենք կառավարության շենքից։ Հաջողությունը սկսվել է Սյունիքից վտարումով։ Մյուս մարզերին կոչ եմ անում՝ ոտքի՛»: