Գեներալ Սոլեյմանին լրջորեն խոչընդոտում էր ԱՄՆ-ի` քաղաքական գերիշխանության հասնելու ծրագրերի իրականացմանը. «Հեզբոլլահ»
«Հեզբոլլահ» լիբանանյան շարժման փոխհրամանատար Շեյխ Նաիմ Ղասեմը հայտարարել է, որ Միացյալ Նահանգները որոշում էր կայացրել սպանել Իրանի «Իսլամական հեղափոխության պահապանների կորպուսի» հատուկ ստորաբաժանման հրամանատար, գեներալ-լեյտենանտ Ղասեմ Սոլեյմանիին, քանի որ նա գլխավոր խոչընդոտն էր տարածաշրջանում Վաշինգտոնի առաջխաղացման համար: Այս մասին տեղեկացնում է «Թանսիմ» գործակալությունը:
«Թրամփը որոշում չէր կայացնի բացեիբաց կերպով սպանել Ղասեմ Սոլեյմանիին, եթե նա անդադար չտապալեր Միացյալ Նահանգների հեգեմոնիկ ծրագրերն ամենացավալի կերպով»,- ասել է փոխհրամանատար Շեյխ Նաիմ Ղասեմը:
«Գեներալ Սոլեյմանին այսպիսի մեծ տեղ չէր ունենա մարդկանց սրտերում, եթե չլինեին նրա ձեռքբերումներն ու դիմակայությամբ գրանցած հաղթանակները»,- հավելել է «Հեզբոլլահի» ներկայացուցիչը:
Հիշեցնենք, որ ԻՀՊԿ «Ալ-Քուդս» ստորաբաժանման ղեկավար Ղասեմ Սոլեյմանին սպանվել է 2020 թվականի հունվարի 3-ին Բաղդադի օդանավակայանի ուղղությամբ հասված ամերիկյան ավիահարվածի ժամանակ:
