Քաջարանի քաղաքապետ Մանվել Փարամազյանը հրավիրվել է Քննչական կոմիտե: Լրագրողների հետ զրույցում Փարամազյանը նշեց, որ իր համար անհասկանալի է, թե ինչու են կանչել. «Անհեթեթություն է: Ամենակարևորն, ինչն ուզում եմ արձանագրել, դա այն է, որ ես՝ որպես համայնքի ղեկավար ու Քաջարան ջոկատի հրամանատար, մարտական դիրքերը թողել եմ ու եկել հարցաքննության: Բնականաբար սա քաղաքական պատվեր է, հետապնդում:

Այս իշխանություններին ձեռք չի տալիս հերոս տղաներ ունենալը: Մենք մտահոգված ենք մեր սահմանների պաշտպանությամբ, իսկ իրենք տեսեք, թե ինչով են զբաղված»:

Հարցին, թե Սյունիքում իրավիճակն այս պահին ինչպիսին է, քաղաքապետն ասաց, որ նորմալ է. «Սյունեցին դարերի ընթացքում միշտ ունեցել է հզոր կեցվածք: Մենք այսօր իշխանություններից անվտանգություն ենք պահանաջում ու ապահով կյանք: Մենք պաշտոն չենք ուզում, ուզում ենք ապրել խաղաղ երկնքի տակ, բայց չեն ապահովում դա:

«Այն մարտական դիրքերում, որոնք մենք թողեցինք, մենք վարչապետ կոչեցյալի կոչով անցել էինք ինքնապաշտպանության: Երբ եկան ու ասացին, որ պետք է թողնել դիրքերը, ցավ ապրեցինք: Դա իրականում ցավալի է»:

Նշենք, որ այստեղ են հավաքվել մեծ թվով քաղաքացիներ, ովքեր վանկարկում են «Մանվել» ու «Նիկոլ, դավաճան»:

«Մենք մեր պահանջին հավատարիմ ենք: Վարչապետին մեղադրում ենք նախ նրա համար, որ պատերազմ եղավ: Մենք պատերազմի սկսելուց հետո ջոկատով գնացինք Ջաբրայիլ: Տեսել ենք ամեն ինչ՝ 5-10 օր պատերազմ եղավ, հետո՝ նահանջ, նահանջ, նահանջ:

Այսօր ինչո՞ւ պետք է մարդիկ այլընտրանքային ճանապարհներով գնան: Թուրքը եկել հասել է Որոտան, հասել են մարդկանց տան առաջ: Երեկ տեսաք, որ մի տան բնակիչներին ժամանակ էին տվել ազատել տունը»,-ասաց նա:

«Մենք ահանջում էինք բուֆերային զոնա ստեղծել, որպեսզի անվտանգ լինի, բայց բերել ու հասցրել են Կապան: Մարդիկ մտահոգված են: Սա բերելու է թշվառության, գաղթի: Այս իշխանությունը սա է ուզում: Բայց սյունեցին կոտրվող չէ, իրենք են իսկական դուխովները, դա միայն գլխարկի վրա գրելով չէ»,-հավելեց նա: