Հնչում են կոչեր՝ կիրակի օրը Մայր Աթոռը գրոհելու մասին։ Ամենայն հավանականությամբ կոչերը եւ հնարավոր գործողությունները համակարգվում են Նիկոլ Փաշինյանի կամ նրա թիմակիցների կողմից։ Դժվար է ասել, թե իրականում կիրակի օրը որեւէ գործողություն կլինի թե ոչ, սակայն կարեւոր է, որ անձամբ եւ Նիկոլ Փաշինյանը եւ նրա թիմակիցները հասկանան դրա հետեւանքները․ ընդ որում, խոսքը կրոնական հետեւանքների մասին չէ․ դրանք թողնենք մի կողմ։ Խոսքը քաղաքական եւ գեոպոլիտիկ հետեւանքների մասին է։

Որեւէ մեկի համար գաղտնիք չի լինի, եթե ասենք, որ Ղարաբաղյան երկրորդ պատերազմում հաղթեց Ռուսաստանը՝ վերստին ամրացնելով իր դիրքերը նաեւ՝ Ադրբեջանում ռազմական ներկայությամբ։ Դրանք իհարկե կոչվում են խաղաղապահներ, սակայն հետաքրքիր է, ռուսական ռազմական դոկտրինը ենթադրում է հարձակողական կամ հարվածային զորքերի առկայություն, խաղաղապահ զորքերը հետեւաբար նույն հարվածային զորքերն են։ Ռուսաստանը «յուրացնում» է Կովկասը վերստին․ իսկ դրա համար նրան պետք է նաեւ այնտեղ ապրող ժողովուրդների միջեւ նորմալ հարաբերություններ, իսկ այ այդ հարցում նա կարեւոր է համարում այդ ժողովրուրդների ավանդական կրոնական կազմակերպությունների դերակատարությունը։

Ավելի պարզ ասած՝ Ռուսաստանի աշխարհաքաղաքական շահերին համապատասխանում է կայուն ու ապահով Հայ Առաքելական եկեղեցի։ Պատահական չէ, որ Գարեգին Բ-ի խնդրանքը Ռուս Ուղղափառ եկեղեցու ղեկավար Կիրիլ պատրիարքին կապված Դադիվանքի եւ Ս․ Ղազանչեցոցի հետ ընդառաջվեց Կրեմլի կողմից եւ Դադիվանքում կա հայկական ներկայություն։ Որեւէ գործողությունը Մայր Աթոռի դեմ Կրեմլը չի ընկալելու որպես գործողություն անձերի դեմ, այլ ընկալելու է գործողություն Առաքելական եկեղեցու դեմ, իսկ ոտնձգությունը Առաքելական եկեղեցու դեմ, արդեն ոտնձգություն է իր Ռուսաստանի շահերի դեմ, մի բան, որը լինելու դեպքում անձամբ Փաշինյանը եւ իշխող թիմը պետք է պատրաստ լինեն չափազանց ցավոտ հակազդեցություն Կրեմլի կողմից։

Իշխանության ներսում, կարծես թե իրականությունից չկտրված մարդիկ դեռ կան, որոնք հասկանում են, որ այս իրավիճակում Կրեմլի զայրույթը հարուցելը կարող է իրենց համար չափազանց թանկ արժենալ։ Իսկ եթե այդ զայրույթը այնուհանդերձ հարուցվեց, մնացած հակազդումն ու հետեւանքները ընդամենը տեխնիկայի հարց կարող է լինել։