Նիկոլ Փաշինյանի՝ Սյունիքյան տապալված այցը կարելի է համարել գործող իշխանությունների՝ իրականության հետ դառն առերեսման պահը։ Փաշինյանը հասկացավ այս այցից հետո, որ նոր ընտրությունները անխուսափելի են, իսկ իրավիճակն իր վերահսկողությունից դուրս է գալիս։ Ավելին՝ նա կորցնում է իշխանությունը նույնիսկ վարչապետի աթոռին նստած։

Որպես ավելի քան տասնհինգ տարվա քաղաքական գործունեության փորձառություն ունեցող մարդ, նա հասկանում է, որ հետպատերազմական իրավիճակում, այն էլ, երբ պարտված ես, սկսվելու են նաեւ տնտեսական դժվարությունները, եւ առանց այն էլ անկում ապրող վարկանիշից կարող է պարզապես բան չմնալ, մինչեւ ասենք հերթական ընտրություններ, որովհետեւ ինչ էլ անես, պարտության խարանը ճակատիցդ չի մաքրվի։ Ուստիեւ կարելի է վստահաբար ասել, որ արտահերթ ընտրությունները հեռու ապագայի հարց չեն։

Ավելին, Politik.am-ը ունի տեղեկություններ, որ Փաշինյանը այժմ ակտիվորեն քննարկում է նոր ընտրությունների անցկացման հարցը։ Ընդ որում, նա շտապում է, եւ ամեն գնով ուզում է, որ ինքը կազմակերպի նոր ընտրությունները։ Սա նույնպես ունի իր բացատրությունը, որովհետեւ երբ դու որպես իշխանություն կազմակերպում ես արտահերթ ընտրություններ, որպես իշխանություն կարող ես ազդեցությանդ եւ ունեցածդ լծակները գործի դնել։ Իսկ այդ ամենի գործադրման արդյունքում Փաշինյանը մոտ 35-40 տոկոս ձայն հավաքելու հույս ունի։ Բացի այդ, հետպատերազմական շրջանում անխուսափելիորեն վրա է հասնելու տնտեսական ճգնաժամը։ Հայաստանին դեռ վերականգնման «Մարշալյան պլան» ոչ մեկը չի առաջարկել, իսկ դա նշանակում է, որ օր օրի վատանալու է տնտեսության վիճակը։

Փաշինյանի թիմում սա էլ են լավ հասկանում, եւ մեր ունեցած տեղեկություններով ուզում են նոր ընտրություններն անցկացնել արդեն մարտ-ապրիլ ամիսներին, որովհետեւ հապաղումը, ձգձգումը կարող է բերել նրան, որ հետպատերազմական ճգնաժամը խլի ողջ վարկանիշը գործող թիմի եւ արդյունքում, իրենց իսկ հաշվարկներով նույնիսկ 10-15 տոկոսի հույս չունենան։ Ի դեպ, նոր ընտրությունների անցկացման օգտին են նաեւ այն ազդակները, որոնք գալիս են արտաքին խաղացողներից, որոնք ուշի ուշով հետեւում են հայաստանյան զարգացումներին եւ գնահատում իրավիճակը՝ հնարավոր բոլոր զարգացման տարբերակներով՝ իրենց անելիքը իմանալու համար։