Հունվարի սկզբին տեղի կունենա իրանա-ադրբեջանական տնտեսական հանձնաժողովի նիստ. Իրանը կմասնակցի ԼՂ-ի՝ Բաքվի վերահսկողության տակ անցած տարածքների վերականգնմանը
Իրանի նախագահի աշխատակազմի ղեկավար Մահմուդ Վաեզին հայտարարել է, որ Իրանի և Ադրբեջանի համատեղ տնտեսական հանձնաժողովի նիստը տեղի կունենա հունվարի սկզբին, գրում է IRNA-ն։
Վաեզին նշել է, որ երեքշաբթի Իրան է այցելել Ադրբեջանի փոխվարչապետ Շահին Մոստաֆաևը և որ «ուղևորության ընթացքում ձեռք բերված կարևորագույն պայմանավորվածությունների թվում են Նախիջևանում նոր էլեկտրակայանի և Աստարաչա գետի վրա կամրջի կառուցումը, ինչպես նաև իրանական ընկերությունների մասնակցությունը Ադրբեջանի վերահսկողության տակ անցած շրջանների վերականգնմանը»:
Նա հայտարարել է, որ «Ադրբեջանի և Հայաստանի միջև հակամարտությունից հետո պայմանները փոխվել են, և նոր պայմանների օգտագործումը պահանջում է մի շարք հարցերի շուրջ բանակցություններ»:
Նա նաև հավելել է, որ բանակցությունների համաձայն՝ Իրանն ու Ադրբեջանը պետք է համագործակցեն տրակտորների, ավտոբուսների և դեղորայքի արտադրության հարցում, և, նրա խոսքով, Իրանը պետք է դրանց արտադրության համար գործարաններ կառուցի Ադրբեջանում:
Անդրադառնալով այցի ընթացքում ձեռք բերված արտոնյալ առևտրային համաձայնություններին՝ Վաեզին ասել է, որ որոշում է կայացվել երեք շաբաթ անց՝ հունվարի սկզբին, Թեհրանում Իրանի և Ադրբեջանի համատեղ տնտեսական հանձնաժողովի նիստ անցկացնել։
Նրա խոսքով՝ «նոր իրադարձությունները կխթանեն Թեհրանի և Բաքվի միջև հարաբերությունները»։
Իրանի էներգետիկայի նախարար Ռեզա Արդաքանյանը հայտարարել էր, որ Իրանն ու Ադրբեջանը համաձայնության են եկել Խուդաֆերինի ջրամբարի վրա ջրաէլեկտրակայան կառուցելու հարցի շուրջ:
