Որոնում եմ իմ եղբոր որդուն, ուզում ենք հասկանանք՝ ունե՞նք պետություն, թե՝ չունենք։ Մենք փողոց ենք փակում, որովհետև մեր պատկան մարմինները ոչ մի օգնություն ցույց չեն տալիս․ լրագրողների հետ զրույցում նշեց անհետ կորած զինծառայողի հարազատ Սերգո Գալստյանը:

Նշենք, որ այսօր Երևանում տեղի է ունենում անհնազանդության ակցիա։ Անհետ կորած և գերեվարված զինծառայողների ծնողներն ու հարազատները Բաղրամյան փողոցը փակել են ավտոմեքենաներով։

Սերգո Գալստյանի խոսքով՝ ինքը եղել է Արցախում, մասնակցել է որոնողական աշխատանքներին, այդ հարցում նրանց օգնել է Արցախի Արտակարգ իրավիճակների ծառայությունը:

«Այժմ առաջնահերթ խնդիր է անհետ կորած, գերեվարվածների խնդիրը, արդեն ձյուն է մենք չգիտենք այդ երեխաները որտե՞ղ են, ի՞նչ պայմաններում են, զոհվածների մարմինները չենք կարողանում այնտեղից դուրս բերել։ Մենք ձայն բարձրացրեցինք, որ կան երեխաներ, ովքեր կապի են դուրս եկել, բայց մեզ թերահավատորեն են մոտեցել, ասել են՝ հեսա «դռոն» կթռնի, ուղղաթիռ կթռնի ու ժամանակ են ձգել, իսկ մենք ձգելու ժամանակ չունենք: Դեռ ձյունը չէր եկել, ասում էինք՝ ձյուն է գալու, ողջ մնացածները հետք են թողնելու ձյան վրա: Ես գործող իշխանություններից իրական քայլեր չեմ տեսել: Թող մեզ պատասխան տան, ինչքա՞ն գերի ունենք, և ո՞վ է զբաղվում այդ հարցով, հաստատ Փաշինյանն այդ հարցով չի զբաղվում»,- նշեց նա։