Իրանն ուժեղացրել է հակաօդային պաշտպանությունն իր միջուկային օբյեկտների շուրջ որպես կանխարգելիչ միջոցառում՝ ընդդեմ ամերիկյան հնարավոր հրթիռային հարվածների։ Իրանական կողմը չի բացառում ռազմական բնույթի հանկարծակի իրադարձությունները Սպիտակ տնից Դոնալդ Թրամփի հեռանալուց առաջ։ Այս մասին հայտնում Քուվեյթի Al Qabas թերթը՝ հղում անելով իսլամական հանրապետության իրազեկ աղբյուրներին։

Օբյեկտների պաշտպանության համար պատասխանատու են Իսլամական հեղափոխության պահպանների կորպուսի օդատիեզերական ուժերի զենիթային համալիրներն ու ռադիոտեղորոշիչ միջոցները։

Աղբյուրները նշում են, որ ողջ հակաօդային ներուժը գործի է դրվել հնարավոր հրթիռային հարվածի հետմղման համար։ Հնարավոր հրթիռային հարվածն ուղղված կլինի իրանական միջուկային ծրագրի համար կենսական կարևորություն ունեցող օբյեկտներում ուրանի հարստացման գործընթացի խաթարմանը։