Ես րոպեներ առաջ հաղորդագրություն ստացա, որ ԱԱԾ-ն հերթական անգամ Գորիս-Կապան ճանապարհի մասով խնդիրները հաղթահարելու նպատակով բոցաշունչ տեքստ է հրապարակել ու հայտնել, որ «գոլդ» հեռախոսահամար է գործարկել՝ 015 20 20 20: Այս մասին խորհրդարանում հայտարարեց ԲՀԿ-ական պատգամավոր Իվետա Տոնոյանը՝ հավելելով, որ հայտարարությունը կարդալիս կարծել է, որ նոր ենթակառուցվածքներ են գործելու կամ նոր ստորաբաժանումներ:

«Այսինքն, սա առավելագույնն է, որը կարող է անել մեր իշխանությունը Գորիս-Կապան ավտոճանապարհի անվտանգությունն ապահովելու նպատակով: Ես անասելի ցավ եմ ապրում, որ մեր սահմանների ու քաղաքացիների անվտանգությունը որոշվում է նման մարդկանց ու կազմակերպությունների կողմից»,-ասաց նա:

Հիշեցնենք, որ օրեր առաջ ԱԱԾ-ն հայտարարություն էր տարածել՝ հեռախոսահամարներ հրապարակելով ու տեղեկացնելով, որ քաղաքացիները Գորիս-Կապան ճանապարհով անցնելիս խնդիրներ ունենալիս կարող են զանգահարել: Խոսքը վերաբերում է այն հատվածին, որը Նիկոլ Փաշինյանի որոշմամբ անցել է Ադրբեջանին: Ճանապարհի այդ հատվածում ադրբեջանական ուժեր կան: Ավելի ուշ նաև հրապարակումներ եղան, որ ԱԱԾ-ն հորդորում է ճանապարհի այդ հատվածն անցնելիս մեքենան արագ վարել ու կանգ ճառնել: