ԲՀԿ Ուսանողական Խորհրդի նախագահ Լիաննա Մանուկյանը   «Հայրենիքի փրկության շարժմանը»  միացել է պայքարի առաջին իսկ օրերից։ Նա նշում է՝  ինքն ու իր ընկերները չեն դադարելու պայքարել, քանի որ  հասել ենք մի իրավիճակի, երբ  դրված է   հայրենիքի լինել-չլինելու հարցը։

«Մենք հայրենիք ենք կորցրել այս մարդու «թեթև ձեռքով»։ Մենք չպետք է  թույլ տանք, որ նա շարունակի ղեկավարել մեր երկիրը,  պետք  է անենք  հնարավոր ամեն ինչ  նրան հեռացնելու համար։  Նիկոլ Փաշինյան ազգադավը մեր պատմության միակ ղեկավարն է, որն  նման  խայտառակ իրավիճակից հետո շարունակում է   կառչած մնալ իր աթոռից։ Մենք պիտտի ամեն ինչ անենք, որ նրան կարողանանք հեռացնել այդ աթոռից, իսկ եթե դա չկարողանանք անել, ապա իրեն   իր աթոռով կհեռացնենք․ դրանում թո՛ղ որևէ մեկը չկասկածի», —  MegaNews.am-ի հետ զրույցում նշեց Լիաննա Մանուկյանը։

Նա շեշտեց՝ եղանակային պայմաններն էլ չեն կարող պայքարի ելած մարդկանց ճնշել։

«Սահմանում անձևի ու ձյան տակ կանգնած մեր տղաները երբեք չեն մտածել մրսելու կամ հիվանդանալու մասին, մենք ևս ոչ մի բարոյական իրավունք չունենք Երևանում վախենալ ցրտից, գնալ տուն, սաքուկ վերմակով փաթափվել  ու դիտորդի աչքերով նայել  այս իրավիճակին։  Նիկոլ Փաշինյանի հրաժարականը պայանջող մարդկանց կոչ եմ անում փողոց դուրս գալ, չնայել եղանակային պայմաններին կամ ճնշվել ոստիկանների կիրառած ուժից»,  - նշեց Լիաննա Մանուկյանը։

Նա վնասվածք է ստացել ոստիկանների կիրառած ուժի, խառնաշփոթի ընթացքում, բայց հրաժարվել է  տուն գնալ, շարունակում է մնալ հրապարակում, պահանջել վարչապետի հրաժարականը։ 

«Շտապ օգնություն եկավ, մասնագետներն ինձ զննեցին, վնասվել է դաստակս։  Քաղաքացիների ու ոստիկանների արանքում մնալով՝ խառնաշփոթի  ընթացքում  դաստակից վնասվելուց զատ՝ շնչասպառ եղա՝ հասնելով գիտակցությունը կորցնելուն․․․  Բայց, հավատացե՛ք, դա  ինձ չի կարող ճնշել։ Պետք է հավաքել ուժերն ու շարունակել պայքարը, քանի որ այս պահին Փաշինյանն արդեն հասել է Տավուշի ու Սյունիքի գյուղերը հանձելուն․ մենք չպետք  է թույլ տանք, որ նա 

շարունակի մեր հայրենիքը թշնամուն հանձնել։ Մեր պայքարն ազնիվ է, մենք չենք ուզում որ արյուն թափվի, ջանում ենք անել հնարավոր ամեն բան՝ բախումներից զերծ մնալու համար», —  նշեց Լիաննա Մանուկյանը՝ շեշտելով՝    իհարկե, ոստիկանների գերակշիռ մասը, ակնհայտորեն  համակարծիք է ցուցարարների պահանջին․ դա պարզ է դառնում նաև  նրանց  հետ զրուցելիս,  և  ակնառու է՝  նրանք   ընդամենը  հրաման են կատարում, քանի որ շատերը չեն կարող  թողնել իրենց աշխատանքը, ունեն սոցիալական խնդիրներ։

Հասմիկ Սարգսյան