Թուրքիայի զինված ուժերի զինծառայողները, բրիգադի գեներալի հրամանատարությամբ, մեկնել են Ադրբեջան։ Այս մասին հաղորդում է NTV հեռուստաալիքը: Ըստ լրատվամիջոցի՝ նրանք հունվարից պետք է սկսեն ծառայել Լեռնային Ղարաբաղի՝ Ռուսաստանի Դաշնության հետ համատեղ դիտորդական կենտրոնում. հայտնում է ՏԱՍՍ գործակալությունը:

Նոյեմբերի 9-ին Ռուսաստանի նախագահ Վլադիմիր Պուտինը, Ադրբեջանի նախագահ Իլհամ Ալիևը և ՀՀ վարչապետ Նիկոլ Փաշինյանը ստորագրեցին համատեղ հայտարարություն Լեռնային Ղարաբաղում ռազմական գործողությունների ամբողջական դադարեցման մասին: Ռուսաստանի ղեկավարի խոսքով ՝ ադրբեջանական և հայկական կողմերը կանգ կառնեն տվյալ պահին եղած դիրքերում, իսկ տարածաշրջանում ռուսական խաղաղապահներ կտեղակայվեն: Նոյեմբերի 11-ին Լեռնային Ղարաբաղում հրադադարի ռեժիմը վերահսկող ռուս-թուրքական համատեղ կենտրոնի ստեղծման մասին հուշագիր է ստորագրվել Հուլուսի Աքարի և Ռուսաստանի պաշտպանության նախարար Սերգեյ Շոյգուի տեսազանգի միջոցով բանակցություններից հետո։