2020 թվականին տարածված պանդեմիան չի լինի վերջինը, միջազգային հանրությունը պետք է ամրապնդի առողջապահական համակարգերն ու պատրաստվի նոր արտակարգ իրավիճակների։ Նման հայտարարություն է արել Առողջապահության համաշխարհային կազմակերպության գլխավոր տնօրեն Թեդրոս Գեբրեյեսուսը։

«Պատմությունը մեզ ասում է, որ ներկայիս պանդեմիան չի լինի վերջինը, և որ պանդեմիաները կենսական իրողություն են»,-ասել է Գեբրեյեսուսը տեսաուղերձում՝ նվիրված դեկտեմբերի 27-ին նշվող Հակահամաճարակային պատրաստության միջազգային օրվան։
Նա նշել է, որ կորոնավիրուսն ունի հանրության ու տնտեսությունների համար հեռուն գնացող հետևանքներ։

Նրա խոսքով՝ դեռևս մեկ տարի առաջ COVID-19-ը մեզ լիովին անհայտ էր, վերջին 12 ամսում աշխարհը ոտքից գլուխ շուռ է եկել։
ԱՀԿ ղեկավարը նշել է, որ անհրաժեշտ է ներդրումներ ուղղել արտակարգ իրավիճակների կանխմանը։ Գեբրեյեսուսը կարծում է, որ մարդկության առողջության բարելավման ցանկացած ջանք կձախողվի, եթե հաշվի չառնվի չափազանց կարևոր փոխգործակցությունը մարդկանց և կենդանիներին միջև, ինչպես նաև էկզիստենցիալ սպառնալիքները՝ կապված կլիմայական փոփոխությունների հետ։