Երեկ, Միքայել Մինասյանը Ֆեյսբուքյան իր էջի ուղիղ եթերում, հայտնեց որ պատերազմից 26 օր առաջ Հայաստանի ԱԽ քարտուղար Արմեն Գրիգորյանը նամակ է ստացել ՀԱՊԿ գլխավոր քարտուղարից, ով զգուշացրել է՝ սպասվող պատերազմի ու այն մասին, թե ինչպիսին է լինելու պատերազմը։

Նույն նամակում ՀԱՊԿ գլխավոր քարտուղարը ասել է, որ Հայաստանը պետք է դիմի ՀԱՊԿ-ին, ինչը սակայն Երևանը չի արել։

Մինասյանը հայտնեց, որ եթերից հետո հրապարակելու է վերոնշյալը վկայող փաստաթղթերը։

«Խոստացածս փաստաթղթում հստակ նշված է, որ ՀՀ վարչապետը թուրք-ադրբեջանական ագրեսիային դիմակայելու նպատակով օժանդակության համար պետք է դիմեր ՀԱՊԿ գործընկերներին` դեռևս պատերազմական գործողությունները չսկսած:

Մինչդեռ Նիկոլ Փաշինյանը ո´չ պատերազմի նախօրեին, ո´չ էլ դրա ընթացքում չդիմեց ՀԱՊԿ:

Ավելին, հաղթանակի մասին 44 օր խաբելով՝ երկիրը տարավ կապիտուլյացիայի, որովհետև պարտավորություններ ուներ իր «կիրթ ու կառուցողական» ընկերոջ նկատմամբ:

Փաստաթղթում մանրամասն նկարագրված է այն, ինչին հետագայում մենք ականատես եղանք պատերազմի ժամանակ», - գրել է Միքայել Մինասյանը Ֆեյսբուքյան իր էջում։