Տնտեսական առումով տարին գրեթե մոտենում է 2009 թվականի ճգնաժամային տարվա անկումային ցուցանիշին: Այս մասին Tert.am-ի հետ զրույցում ասաց «Բարգավաճ Հայաստան» խմբակցության պատգամավոր Միքայել Մելքումյանը` անդրադառնալով 2020 թ. 11 ամիսների տնտեսական ցուցանիշներին:

Նա նշեց, որ իրենք դեռ ապրիլ ամսվա սկզբին զգուշացրել էին, որ անկումը շատ կլինի, քան կառավարության կանխատեսած ցուցանիշն էր: «Ես կարծում եմ, որ առնվազն մինուս ինը տոկոս է լինելու տնտեսական անկման ցուցանիշը: Այդ անկումները մինչև պատերազմն էլ կային, սակայն հիմա ներդրողների մոտ բացասական սպասումների ֆոն է առաջացել, և որքան այս իշխանությունը շարունակի մնալ, այդքան այս անորոշությունը, բացասական սպասումները շարունակվելու են։ Այսինքն` ստացվում է, որ միտումնավոր իշխանությունը կառչած է իր աթոռից»,-ասաց նա և նշեց, որ, ցավոք սրտի, այս միտումը շարունակվելու է 2021 թվականին ևս, և այս իշխանությունը որևէ դրական բեկում չի կարող մտցնել:

Մասնավորապես՝ շինարարության երկնիշ թվով նվազման վերաբերյալ Միքայել Մելքումյանն ասաց, որ շինարարությունը ամենազգայուն ոլորտներից մեկն է, քանի որ շինարարությունը երկարատև գործընթաց է: «Պահանջարկը նվազում է, և մարդիկ չեն ցանկանում այս ոլորտում ներդրում անել, եթե, օրինակ, բնակարան ես գնում կամ արտադրական տարածք, նշանակում է հույս ես կապում, սակայն հիմա չկա վստահություն իշխանության նկատմամբ»,-ասաց նա և նշեց, որ փոխարժեքի տատանումը ևս իր հերթին տանում է աղքատացման:

«Հիմա հարցը կախված է նրանից, թե որքան կտևի իշխանափոխության այդ անցումային փուլը, որքան կարճ տևի, այնքան կհանգուցալուծվի այդ վիճակը, որքան երկար տևի, այդքան այդ մինուսները շարունակվելու են: Սնանկացումներ են հնարավոր, նույնիսկ չգիտենք՝ երկու-երեք ամիս հետո թոշակ-աշխատավարձերը կտան, թե չեն տա, քանի որ հարկային մուտքերն են էականորեն կրճատվել»,-ասաց նա:

Պատգամավորը հայտնեց, որ եթե 2020 թվականի համար մեկ տրիլիոն 607 միլիարդ դրամ հարկային մուտք պետք է լիներ, դեկտեմբերի մեկի դրությամբ կա մեկ տրիլիոն 260 միլիարդ դրամ: «Այսինքն՝ սա նշանակում է, որ լրջագույն պրոբլեմներ են առաջանալու սոցիալական ոլորտում, և սրանով սպառման մակարդակը կտրուկ ընկնելու է: Եթե այս անիշխանության վիճակը շարունակվի, շարունակվելու են կտրուկ անկումները, և լրջագույն պրոբլեմ կունենա բանկային համակարգը»,-ասաց նա:

Հիշեցնենք, որ ՀՀ ազգային-վիճակագրական ծառայության հրապարակած 2020 թ. նոյեմբերի՝ ՀՀ սոցիալ-տնտեսական վիճակը բնութագրող նախնական մակրոտնտեսական ցուցանիշների համաձայն` 2020 թ․ 11 ամիսների ընթացքում՝ հունվար-նոյեմբերին, նախորդ տարվա նույն ժամանակահատվածի համեմատ, տնտեսական ակտիվության ցուցանիշը (ՏԱՑ) 7.2 % անկում է գրանցել։ Իսկ 2020 թ. նոյեմբերին 2019 թ. նոյեմբերի համեմատ ՏԱՑ-ը նվազել է 10.3 %-ով:

Այս տարվա հունվար-նոյեմբեր ամիսներին շինարարության ծավալը կրճատվել է 11․2 %-ով, առևտրի շրջանառությունը՝ 13.5 %-ով, արդյունաբերական արտադրանքի ծավալը՝ 0.2 %-ով և ծառայությունների ծավալը՝ 13.6 %-ով: