«Հայրենիքի փրկության շարժման» մասնակիցները շարունակում են պահանջել վարչապետի պաշտոնը զբաղեցնող Նիկոլ Փաշինյանի հրաժարականը։  Այս պայքարի բովում են նաև բազմաթիվ երիտասարդներ, որոնք վստահեցնում են՝   շարունակելու են նույն ոգով  պայքարել, գիշերել Հանրապետության հրապարակում այնքան ժամանակ, մինչև Նիկոլ Փաշինյանը  հրաժարական տա։

ՀՅԴ «Նիկոլ Աղբալյան» ուսանողական միության վարչության ատենապետ Տարոն Ղազարյանը MegaNews.am-ի թղթակցի հետ զրույցում նշեց՝ հավաքներն անցկացվում են հերթափոխով, քանի որ եղանակային պայմանները փոքր-ինչ անբարենպաստ են։ Խոսելով Հանրապետության հրապարակում ծառայություն իրականացնող  ոստիկանների մասին՝ Տարոն Ղազարյանը նշեց՝ նրանք բարեխիղճ ծառայություն են իրականացնում։

«Հանրապետության հրապարակում հայտնվում են նաև նույնանման տեքստեր արտաբերող սադրիչներ։ Այդ քաղաքացիները փորձում են հավաքի մասնակիցներին սադրել, խնդիրներ առաջացնել, բայց ոստիկանությունն արագ արձագանքում է ու իրականացնում  բարեխիղճ ծառայություն», — նշեց Տարոն Ղազարյանը՝ վստահեցնելով՝ հավաքի մասնակիցները չեն տրվում սադրանքներին։

Նա շեշտեց՝ սադրիչներից ու  հատուկ նպատակով ուղարկված  մարդկանցից  բացի՝ մյուս քաղաքացիների հետ զրույցելիս ակնհայտ է դառնում՝ նրանք չեն ընդունում Փաշինյանի՝ շուրջ երեք տարի իրականացրած  կազմաքանդիչ գործունեությունը, չեն կարողանում համակերպվել այն փաստին, որ  հայրենիքի մի մասը կորսված է, կան բազմաթիվ զոհեր, վիրավորներ, գերիներ, և մինչ օրս բազմաթիվ կարևորագույն հարցեր անուշադրության են մատնված։

«Մեր պայքարի նպատակը Նիկոլ Փաշինյանին և նրա քաղաքական թիմին իշխանությունից օր առաջ հեռացնելն է, որպեսզի նրանց  վտանգավոր գործունեությունը չշարունակվի և երկրում  ձևավորվի ազգային համաձայնության ժամանակավոր կառավարություն՝  տեխնոկրատ կադրերից բաղկացած, որոնք  պատասխանատվություն կստանձնեն և պետական կառավարման համակարգը կօգտագործեն մեր   ժողովրդին ու մեր հայրենիքն այս վիճակից հանելու համար», -  ընդգծեց Տարոն Ղազարյանը։

Նա շեշտեց՝ վստահ է՝ իրենց պայքարը հաջողության կհասնի,   և հնարավոր    կլինի ապահովել մեր երկրի սահմանների ամրությունը և հնարավորինս խուսափել նոր զոհեր ու գերիներ ունենալուց։
Այսօր Տարոնի ծննդյան օրն է, նա դարձյալ Հանրապետության հրապարակում  է։ Տարոնի ընկերները  Հանրապետության հրապարակում փոքրիկ անակնկալ են պատրաստել, շնորհավորել նրան․․․ Տարոնի ընկերները հիշում են՝ նախորդ տարիներին Տարոնի տարեդարձին միշտ իրենց կողքին էր լինում իրենց  ընկերը՝ Կիմը․․․ Նա զոհվեց հայրենիքի համար մղվող պայքարի օրերին։  Տարոնն ու ընկերները հիշում են Կիմին ու վստահեցնում՝ կիսատ չեն թողնելու  Կիմի ու մյուս քաջերի պայքարը, պայքարելու են, անելու են հնարավոր ամեն բան,  որպեսզի մեր հայրենիքի կորացած մեջքն ուղղվի ու հայրենիքի համար նոր գարուն գա։

«Հայրենիքի փրկության շարժման»  մեկ այլ մասնակից՝ Մանե Բոզոյանը մեր թղթակցի հետ զրույցում նշեց՝ իր ընտանիքն այս օրերին հրապարակ է դուրս եկել՝ վարչապետի հրաժարականի պահանջով։  Մանեի հայրը մասնակցել է  արցախյան երեք պատերազմներին։ Մանեն պատմեց՝  երբ իր հայրը պատերազմից տուն էր վերադարձել, նրա աչքերում կարծես մեր քաջերի, սուրբ հայրենիքի կորստի ցավն էր մխում,  ցավ, որը չի սպիանում։  Բայց այս օրերին էլ նա շարունակում է պայքարել, հրապարակում է լինում։

«Մենք դրսում մի փոքր մրսում ենք, բայց չէ՞ որ մեր զինվորներն իրենց կյանքն են զոհասեղանին դրել։ Մենք շարունակելու ենք պայքարել այնքան, մինչև վարչապետը հրաժարական տա։ Մենք պետք է  փրկենք մեր հայրենիքի մնացյալ մասը։ Վիճակն ավելի վատ է, քան կարելի է պատկերացնել։ Կարծում եմ՝ այսօր դրված է մեր հայրենիքի անկախ լինելու-չլինելու հարցը, մեր՝ հայրենիքում ապրել շարունակելու կամ չշաչունակելու հարցը։ Ես մեղք եմ համարում անտարբերությունը։ Չի կարելի հայրենիքի, ստեղծված իրավիճակի նմկատմամբ անտարբեր լինել։ Հիմա պետք է կանգնել կողք կողքի,  միմյանց հենարան լինել ու փրկել մեր հայրենիքը», — նշեց Մանե Բոզոյանը։

Նա շեշտեց՝ ոստիկաններն,  ընդհանուր առմամբ, բարեխղճորեն են իրականացնում իրենց ծառայությունը, բայց նրանցից ոմանք երբեմն այնպիսի վերաբերմունք են ցուցաբերում քաղաքացիների նկատմամբ, որը հնարավոր չէ հասկանալ։

«Հավաքի մասնակիցների թվում կան երիտասարդներ, որոնք պատերազմի մասնակից են եղել, և նրանց  այդ վերաբերմունքով բերման ենթարկելը  ես չեմ կարող հասկանալ։ Նրանց հետ այդպես վարվելով՝  ամեն երիտասարդի մեջ մի կտոր հայրենիք են սպանում», — նշեց Մանեն։

Այս օրերին իր ակտիվ պայքար է մղում նաև Անի Մելքոնյանը։ Նրա հայրը զինվորական է եղել ու զոհվել է իր սուրբ պարտքը կատարելիս։ Անիի եղբայրը ևս զինվորական է։

«Ես մասնագիտությամբ պատմաբան եմ, ու գիտակցում եմ, որ  այսպես մենք կորցնում ենք ոչ միայն Արցախն ու Սյունքիքի մարզի գյուերը, այլև վտանգի տակ է դրվում մեր պետականությունը», — նշեց Անին՝ շեշտելով՝ թշնամին չի բավարարվի այսքանով, ցանկանում է ավելին զավթել։

«Թուրքրայի նպատակը պանթյուրքիզմն է, և   նրանց քարտեզները նայելով՝ հասկանում ենք՝  իրենց ճանապարհին Հայաստանը չպետք  է լինի։ Ցավով եմ ասում, բայց  ՀՀ ղեկավարը, որը իշխանության եկավ ժողովրդական մեծ շարժման  ալիքի վրա, դարձել է պանթյուքիզմի ծրագիրն իրագործող գործիքներից մեկը, այսինքն՝ այն, ինչը  30 տարի Թուրքիան ու Ադրբեջանը ձգտում էին իրագործել  ու չէին կարողանում,  ՀՀ ղեկավարը հեշտությամբ իրագործեց․ ունեցանք 5 հազարից ավելի զոհ, վիրավորներ, գերիներ, անհետ կորածներ, արցախցիների մեծ մասն անտուն մնաց, Սյունիքում ևս ոմանք  լքում են իրենց տները․․․», — նշեց Անի Մելքոնյանը՝ շեշտելով՝  հայ ազգը կանգնած է պետականության կորստի վտանգի առաջ պետք է ոտքի ելնել, պայքարել ու Նիկոլ Փաշինյանին հեռացնել պաշտոնից՝ հանուն հայրենիքի փրկության։