Գագիկ Ծառուկյանի ու Նիկոլ Փաշինյանի հանդիպումից հետո   պղտոր ջրերում ձուկ որսացողները հարմար պահի էին սպասում՝  իրականությունից հեռու «քաղաքական վերլուծություններ» անելու համար, սակայն սթափ դատող յուրաքանչյուր քաղաքացի գիտի՝ Գագիկ Ծառուկյանը ոչ մի դեպքում չի կարող համաձայնություններ ունենալ, սակարկումների գնալ  վարչապետի պաշտոնը զբաղեցնող Նիկոլ Փաշինյանի հետ:  ԲՀԿ-ի ու   Ծառուկյանի պահանջը շարունակում է մնալ նույնը՝ Նիկոլ Փաշինյանը պետք է հրաժարական տա, այս իշխանությունը պետք է հրաժարական տա, որպեսզի   հնարավոր լինի մեր  հայրենիքն այս օրհասական վիճակից դուրս բերել։

Գագիկ Ծառուկյանը միշտ ժողովրդի կողքին է եղել և ժողովրդի պահանջը նաև նրա պահանջն է․  քաղաքացիների   մեծ մասը   հստակ գիտակցում է՝ ինչ օրհասական վիճակի է հասել մեր ժողովուրդն ու մեր հայրենիքը, և պարզ է՝ ով ( կամ ովքեր)  են դրա մեղավորները․  Փաշինյանը պետք է հեռանա ու պետք  է դադարեցվի նրա ու նրա  թիմակիցների ազգակործան գործունեությունը։

Ծառուկյանին կալանքը կամ կարված, սարքված գործերը չեն վախեցրել, նրան ոչինչ չի վախեցնի։ Ծառուկյանը Փաշինյանի հետ  որևէ բան սակարկելու ցանկություն կամ նպատակ  չունի, արտահերթ ընտրությունների մասին էլ խոսք լինել չի կարող, քանի որ բոլորս գիտենք՝  իշխանությունը վերընտրվելու  համար ինչ միջոցներ կարող է կիրառել, բոլորը գիտեն՝ ինչ լծակներ  կան և ինչպես կարող են  կիրառվել։

Եթե Փաշինյանի  առաջարկով  խորհրդարանում մեծությամբ երկրորդ քաղաքական ուժի առաջնորդը հանդիպել է նրա հետ, դա դեռ չի նշանակում, որ իշխանության ներկայացուցիչները կարող են իրենց երևակայությունը գործի դնել ու  Ծառուկյանին իրենց արշինով չափելով՝ «վերլուծություններ»  անել։

Հիշեցնենք՝ Ծառուկյանի հետ հանդիպելուց հետո Փաշինյանը հանդիպեց նաև   ԼՀԿ առաջնորդ Էդմոն Մարուքյանին։ Բայց, պարզ է՝ էպոսներ պետք է հյուսվեն հենց Ծառուկյանի շուրջ, իսկ այդ էպոս հյուսողները նույնքան անհաջողակ են իրենց գործում, որքան իրենց ստանձնած մյուս լիազորություններում։

Ծառուկյանը ժողովրդի մասնիկն է, ժողովրդի հետ է, իսկ ժողովուրդը  մեր սուրբ հայրենիքի, մեր ժողովրդի հետ այսպես վարվող վարչապետ ունենալ չի ուզում։ Մեր ժողովուրդը ազգադավ իշխանություն ունենալ չի ուզում։ Փաշինյանը պետք է հեռանա։

Հասմիկ Սարգսյան