Ռուսաստանը չի նկատել Լեռնային Ղարաբաղում իր խաղաղապահների դեմ որեւէ սադրանք: Այս մասին ՏԱՍՍ-ի հետ հարցազրույցում ասել է Ռուսաստանի արտգործնախարար Սերգեյ Լավրովը:

«Լեռնային Ղարաբաղի հակամարտության գոտում իրավիճակը կարգավորվելու միտում ունի,- նշել է նա: - Գոհունակությամբ ենք նշում Բաքվի եւ Երեւանի տրամադրվածությունը կատարելու ստանձնած պարտավորությունները, գնալու ընդհանուր իրադրության կայունացմանը: Կցանկանայի նշել համատեղելիության բարձր աստիճանը, որը կողմերը դրսեւորում են ծագող հարցերը լուծելիս: Ռուսաստանն իր հերթին շարունակում է պատասխանատվությամբ եւ արդյունավետորեն կատարել հրադադարի երաշխավորի իր գործառույթը: Ռուս խաղաղապահների դեմ սադրիչ գործողություններ առայժմ չեն նկատվել»:

Լավրովը նշել է, թե միակ նկատելի խախտումը, որը գրանցվել էր դեկտեմբերի 13-ին, տեղի է ունեցել շփման գծի այն հատվածում, որտեղ ռուս խաղաղապահներ չեն եղել: «Ադրբեջանցի եւ հայ գործընկերների հետ շփումներում մեր խաղաղապահ զորախմբի հրամանատարության ձեռնարկած եռանդուն քայլերը թույլ են տվել խուսափել միջադեպի ընդլայնումից,- շարունակել է նա: - Հետագայում եւս բոլոր ջանքերը կներդնենք, որպեսզի հրադադարի խափանում թույլ չտանք»: