Նիկոլ Փաշինյանի հրահանգով՝ պատերազմի ընթացքում  համայն հայության կողմից «Հայաստան» համահայկական  հիմնադրամին հանգանակված գումարներից  52 միլիարդ 700 միլիոն դրամը փոխանցվել է պետբյուջե՝ օրենքի խախտումներով և մինչ այս պահը ժողովրդից գաղտնի է պահվում, թե ինչ նպատակով են ծախսվել այդ գումարները։

Այս մասին հայտարարել է Սուրբ Աթոռում ՀՀ նախկին դեսպան Միքայել Մինասյանը՝ հրապարակելով փաստեր։

52 միլիարդ 700 միլիոն դրամը կառավարությանը փոխանցելու համար «Հայաստան» համահայկական հիմնադրամի տնօրեն Հայկակ Արշամյանը, որը Նիկոլ Փաշինյանի մերձավորն է, ընդունել է 9 որոշում, որոնցից 7-ի բնօրինակները  անհայտ հանգամանքներում գողացվել են հիմնադրամի գրասենյակից, որը գտնվում է ՀՀ նախագահի նստավայրում՝ Բաղրամյան 26-ում։

Բացի այդ, դրանցից ոչ մեկը չի ուղարկվել հոգաբարձուների խորհրդի անդամներ Ռոբերտ Քոչարյանին և Արկադի Ղուկասյանին, որովհետև վերջիններս հարցնելու էին, թե ինչի համար են այդ գումարները պետբյուջե ուղղվում։ Նախկին դեսպանի խոսքով՝ այստեղ արդեն իսկ օրենքի խախտում է թույլ տրվել։

Մինասյանի փոխանցմամբ՝ հիմնադրամի հոգաբարձուների խորհրդի նախագահ, հանրապետության նախագահ Արմեն Սարգսյանը նամակ է գրել Հայկակ Արշամյանին՝ նշելով, որ խնդիրներ կան այս գործընթացում, պետք է պարզաբանվի, թե գումարն ինչի համար է պետբյուջե ուղղվել։

«Հայկակ Արշամյանն էլ իր հերթին նամակ է գրում ֆինանսների նախարարին, թե որտեղ է ծախսվել այդ գումարը, նախարարն էլ պատասխանում է` ըստ բյուջեի նախատեսված կարիքների։ Այդ ժամանակ Արշամյանը գաղտնի նամակ է գրում Նիկոլ Փաշինյանին՝ խնդրելով բացատրություն, թե ինչի համար է ծախսվել գումարը, սակայն Նիկոլ Փաշինյանը չի պատասխանում նամակին»,- ասում է Մինասյանը՝ ցուցադրելով ենթադրյալ գաղտնի նամակի պատճենը։

Մինասյանի պնդմամբ՝ այս իրավիճակը կարող է լրջագույն խնդիրներ ստեղծել հիմնադրամի համար, ընդհուպ հասցնել գործունեության կասեցման և այս պահին սկսվել է միջազգային աուդիտ։

Նախկին դեսպանը նշում է, որ հիմնադրամին մեծ գումարներ նվիրաբերած բազմաթիվ սփյուռքահայեր ևս խնդիրների առաջ են կանգնելու։ Որպես օրինակ մատնանշում է ամերիկահայերին։ Նրանք, որոշակի գումար նվիրաբերելով հիմնադրամին, ազատվել են այդ գումարի չափով հարկերից, որովհետև բարեգործական նպատակներով է փոխանցված գումարը եղել։ Սակայն եթե պարզվի, որ ի վերջո նրանց փոխանցած գումարը բարեգործական նպատակներով չի ծախսվել, ապա նրանք խնդիրներ են ունենալու իրենց երկրի հարկային մարմինների հետ։

 

Մինասյանի փոխանցմամբ՝ այդ գումարներով  Նիկոլ Փաշինյանն իր թիմին պարգևավճարներ է բաժանել։