Ռուս խաղաղապահները Ամանորին ապահովում են արցախցիների վերադարձի անվտանգությունը
Ամանորի արձակուրդների ընթացքում Բերձորով երթևեկության ինտենսիվությունն աճել է: Ամանորի նախաշեմին արցախցիները անձնական մեքենաներով ակտիվորեն վերադառնում են Լեռնային Ղարաբաղում գտնվող իրենց տները: Այս մասին հայտնում է ՌԴ ՊՆ պաշտոնական կայքը:
«Ստեփանակերտում քաղաքացիական ենթակառուցվածքների, էլեկտրականության և ջրամատակարարման վերականգնումից հետո տեղի բնակիչները նախընտրում են Ամանորը նշել հարազատ բնակավայրերում:
Ռուսաստանի խաղաղապահ զորակազմի զինծառայողները ապահովում են քաղաքացիների անվտանգ վերադարձը իրենց մշտական բնակության վայրեր և տրամադրում մարդասիրական օգնություն: Տեղի բնակիչները ոչ միայն շնորհակալություն են հայտնում խաղաղապահներին, այլ նաև շնորհավորում նրանց Նոր Տարին»,-ասված է ՌԴ ՊՆ հաղորդագրության մեջ:
Մինչ այժմ ավելի քան 47 հազար փախստականներ արդեն վերադարձել են Լեռնային Ղարաբաղ՝ իրենց մշտական բնակության վայրեր:
