Մայր Աթոռի դիվանապետ գերաշնորհ Տեր Արշակ եպիսկոպոս Խաչատրյանը լրագրողների հետ զրույցում, խոսելով կաթողիկոսի կողմից Նիկոլ Փաշինյանի հրաժարականը պահանջելու ու Սիսիանում հոգևորականի կողմից Նիկոլ Փաշինյանի ձեռքն օդում թողնելու մասին, հայտարարել է, որ ինքը ևս պահանջել է վարչապետի հրաժարականը. «Դա չպետք է դիտարկել անձի նկատմամբ վերաբերմունքի արտահայտություն: Դա պետք է դիտարկել Հայաստանում ստեղծված վերջին ճգնաժամային իրավիճակի մեջ երկրի թիվ մեկ պատասխանատուի ունեցած թերությունների, անկարողության հետևանք: Այս առումով է, որ մենք այդպիսի պնդում կատարել ենք»:

Տեր Արշակը նշել է, որ մեր պատմության ողջ ընթացքում եկեղեցին եկեղեցուց արտաքսել ու դուրս է դրել այնպիսի անձերի, որոնք շատ ավելի նվազ վնաս են հասցրել երկրին, ժողովրդին, քան այն անձը, ով կրում է թիվ մեկ պատասխանատվությունն այս գործընթացների համար. «Չափազանց անհասկանալի կլիներ, եթե եկեղեցին որպես դիտորդ մնար այս իրավիճակից:

Իսկ ինչ վերաբերում է մեր համոզումներին, ուղղակի հնարավոր չէր չարձագանքել այդ երևույթին: Հետևաբար ես շատ բնական եմ համարում մեր եկեղեցու, առավել ևս՝ Ամենայն Հայոց կաթողիկոսի արձագանքն այս իրավիճակին՝ վարչապետի հրաժարականի պահանջումով»: