Ես արտահայտում եմ ոչ թե ՓՊ դիրքորոշումը, այլ այն փաստաբանների, ովքեր հարկ են համարել ներկայացնել հաղորդում: Մենք մի քանի 100 փաստաբաններով գտնում ենք, որ պետք է հարուցվի քրեական գործ ու քրեական հետապնդում պետք է իրականացվի այն անձանց նկատմամբ, ովքեր այս օրերին պարտավոր էին գործել առավել զգոն, կանոնակարգված ու բարձր պատրաստվածությամբ, ինչը չի արվել:

Մեր հաղորդման հիմքում մենք դրել ենք մի շարք փաստական հանգամանքներ: Դրանց համակցության մեջ գնահատելով՝ գտել ենք, որ Նիկոլ Փաշինյանի արարքում առկա է պետական դավաճանության հանցակազմ: Այս մասին «Ազգային աղետ և վերածնունդ. իրավական բաղադրիչը» խորագրով խորհրդաժողովի ժամանակ հայտարարեց իրավաբան Արմինե Ֆանյանը:

«Հաղորդումը ստորագրած փաստաբանները գտել են, որ Նիկոլ Փաշինյանի արարքներում դրսևորվել է պետական դավաճանության հետևյալ եղանակը, մասնավորապես Նիկոլ Փաշինյանը թշնամական գործունեություն իրականացնելու նպատակով թշնամուն ցուցաբերել է օգնություն»,-ասաց նա:

Որպես վերոնշյալի օրինակ Ֆանյանը նշեց բանակցային գործընթացը տապալելու մասին:

Իրավաբանի խոսքերով, դրան նպաստել է Նիկոլ Փաշինյանի հայտարարությունը, որ Արցախը Հայաստան է ու վերջ, ինչպես Տոնոյանի հայտարարությունը՝ «Նոր պատերազմ՝ նոր տարածքներ». «Սրանք գործողություններ են, որոնք հրահրել են պատերազմ: Իսկ հետագայում կատարվել են գործողություններ, որոնք արտահայտվել են թշնամուն օգնություն ցուցաբերելով:

Մասնավորապես խոսքը վերաբերում է լրատվամիջոցների խոսքը սահմանափակելուն: Արվեց այնպես, որպեսզի ԶԼՄ-ները չտրամադրեն օբյեկտիվ ճշմարտությունը, հասարակությանը տրամադրվեց կեղծ տեղեկատվություն, ինչի արդյունքում հանրությունը զրկվեց զգոնությունից՝ ապրելով պատրանքով, որ մենք շուտով հաղթելու ենք:

Նիկոլ Փաշինյանը որոշակի տեղեկատվություն էր հրապարակում, որը հրապարակման ենթակա չէր, օրինակ՝ մեր պարենի, սպառազինության, զինվորների քանակի մասին, նույնիսկ այն մասին, որ մենք ունենք զինվորական հանդերձանքի պակաս: Այս ամեն ինչը ներկայացվել են ուղիղ եթերներում, ուստի հասանելի են եղել նաև թշնամուն»:

Ֆանյանը խոսեց նաև ՌԴ նախագահ Վլադիմիր Պուտինի այն խոսքերի մասին, որ հոկտեմբերի 19-20-ն Ալիևին համոզել են դադարեցնել պատերազմը, միակ պայմանը եղել է փախստականների վերադարձը Շուշի. «Սակայն Նիկոլ Փաշինյանը մերժել է առաջարկը՝ հստակ իմանալով, որ պատերազմը պետք է օր առաջ կանգնեցնել, ինչն ասել են Օնիկ Գասպարյանն ու Արայիկ Հարությունյանը:

Հստակ իմանալով առաջարկը չընդունելու բոլոր հետևանքները՝ մարդկային կորուստներ, տարածքային կորուստներ՝ Նիկոլ Փաշինյանը չի ընդունել այն: Միակ բացատրությունը, թե ինչու չի ընդունել առաջարկը, եղել է այն, իբր իրեն դավաճան կասեին»:

Ֆանյանը խոսեց նաև այն քրեական հետապնդումների մասին, որոնք հարուցվել են մեծ ավանդ ունեցող զինվորականների նկատմամբ. «Ընթացավ բանակի սպայական կազմի վարկաբեկման գործընթաց: Մինչ օրս այդ գործերից որևէ մեկով օրինական ուժի մեջ մտած մեղադրական դատավճիռ առկա չէ, ինչն առնվազն կասկածի տակ է դնում այդ գործերի օբյեկտիվությունը»:

«Գնվել է զինտեխնիկա, որը չէր էլ կարող անգամ արդյունավետություն ունենալ, բոլոր հորդորները պատերազմը դադարեցնելու մասին չեն ընդունվել:

Այս բոլոր արարքներն իրենց համակցության մեջ պարունակում են պետական դավաճանության հանցակազմ: Այս բոլոր արարքները կատարվել են դիտավորությամբ»,-ասաց նա: