Ըստ առկա տեղեկատվության, ռազմական հետախուզության կողմից պատերազմի սկսվելու օրվա ու ժամի վերաբերյալ տեղեկատվության հիմքով Հայաստանում հայտարարված է եղել թիվ մեկ մարտական դրություն, ինչը բերել է նրան, որ զորանոցներից դուրս է բերվել ամբողջ զորքը և զինապահեստներից դուրս է բերվել ամբողջ զինամթերքը: Դրանք պատերազմի սկսվելուց հետո առաջինն են հայտնվում թիրախում, դրա համար այդպես է արվում: Դա նորմա է, կանոն: Այս մասին «Ազգային աղետ և վերածնունդ. իրավական բաղադրիչը» խորագրով խորհրդաժողովի ժամանակ հայտարարեց Արթուր Ղազինյանը:

«Ի տարբերություն Հայաստանի՝ Արցախում թիվ մեկ մարտական վիճակը հանվել էր շատ ավելի շուտ: Սա պետք է ստուգվի վարույթն իրականացնող մարմնի կողմից: Դրա հետևանքով զորանոցում են մնացել զինվորներ, իսկ զինամթերքը դուրս չի բերվել պահեստներից:

Ըստ առկա տեղեկատվության, ահռելի քանակությամբ զինամթերք ոչնչացվել է հենց պահեստներում պատերազմի առաջին մի քանի ժամվա ընթացքում: Եվ բավական մեծ թվով զոհեր ենք ունեցել զորանոցում: Ուղղակի զինվորները քնած են եղել:

Իսկ եթե պատերազմի մասին տեղեկատվություն կա, զինվորներին զորանոցում պահելը ռազմական առումով հանցագործություն է»,-ասել է նա՝ հրավիրելով վարույթն իրականացնող մարմնի ուշադրությունը: