«Երաշխիք չեն տալիս, որ մեր էրեխեքն ապահով կհասնեն Արցախ, ո՞նց թողնենք, որ տանեն». զինծառայողների ծնողներ
Վազգեն Սարգսյանի անվան ռազմական ինստիտուտի դիմաց բողոքի ակցիա իրականացնող ժամկետային զինծառայողների ծնողներն ահազանգում են՝ «մի շարք ժամկետային զինծառայողների բռնի ուժով տեղափոխում են Արցախ»:
«Առավոտյան երեխաներին հայտնել են, որ տանում են Արցախ՝ իրենց զորամասեր: Երեխաները հիմա հրաժարվում են գնալուց: Մենք պահանջում ենք ՊՆ-ից, որ գան իրենք պատասխան տան՝ ինչի՞ են մեր երեխաներին տանում Ղարաբաղ, եթե այնտեղ չի կարող անգամ Հայաստանից նախարար մտնել»,- ասաց ծնողներից մեկը:
Նրանց խոսքով՝ սպայից հարցրել են՝ երշախիք տալի՞ս է, որ իրենց որդիներն անվտանգ կանցնեն ճանապարհը և ետ կվերադառնան, ինչին ի պատասխան սպան ասել է, որ չի կարող դա երաշխավորել:
Ծնողները պնդում են, որ եթե պետությունը չի կարողանալու ապահովել իրենց երեխաների անվտանգությունը, ապա իրենք թույլ չեն տալու որդիներին մեկնել Արցախ:
«Ոչ մեկը երաշխիք չի տալիս, որ մեր էրեխեքն ապահով կհասնեն Արցախ: Ասում են՝ հանում ենք դուրս, դրանից հետո ինչ կլինի՝ կլինի: Իրենք երաշխիք չեն տալիս, մենք ո՞նց թողնենք, որ էրեխեքը գնան Արցախ: Դեմ չենք, թող գնան, ծառայեն, բայց թող երաշխիք տան, որ մեր էրեխեքն ապահով կլինեն»,- ասաց ժամկետային զինծառայողներից մեկի ծնողը:
