Էջմիածնի զորամասերից մեկից Զանգելանի (Կովսական) տարածք մարտական գործողությունների մեկնած և մինչ օրս անհետ կորած համարվող զինծառայողների ծնողներն ու հարազատները հավաքվել են Էջմիածնի այդ նույն զորամասի դիմաց։ Նրանք պնդում են, որ այնտեղ կմնան, կգիշերեն այնքան ժամանակ, մինչև իրենց տղաների վերաբերյալ հստակ տեղեկություններ չունենան։ Ծնողները բողոքի ակցիան սկսել են երեկ, հետո դադարեցրել են։ Այսօր կրկին հավաքվել են, պատրաստվում են խարույկներ վառել և վրաններ ամրացնել։

Հիշեցնենք, որ այդ զորամասից անհետ կորած է համարվում 41 զինծառայող։ Նրանցից մեկն արդեն Հայաստանում է, Ադրբեջանում էր գերու կարգավիճակով։ Ծնողները վստահեցնում են, որ այդ խմբից ևս 22 տղա դարձյալ Ադրբեջանում է՝ գերության մեջ, հարազատները նրանց տեսել են համացանցում տարածված տեսանյութերում: Իսկ 18 զինծառայողներից ընդհանրապես տեղեկություններ չունեն արդեն 81 օր։

Բողոքի ակցիան իրականացնող ծնողների խոսքերով, դեկտեմբերից Ստեփանակերտում որոնողական խմբեր են ստեղծվել, որոնցում նաև իրենցից ներկայացուցիչներ կան: Սակայն Ամանորի նախաշեմին զորամասի հրամանատար Արսեն Աբգարյանը հեռացել է խմբից և վերադարձել Էջմիածին։ Ծնողները պահանջում են նաև, որ վերջինս կրկին միանա խմբին, որպեսզի որոնողական աշխատանքներն առավել ակտիվ շարունակվեն։