Անհետ կորած զինծառայողների հարազատներն այսօր՝ հունվարի 8–ին, կրկին հավաքվել են Էջմիածնի զորամասի դիմաց։

ArmDaily.am-ի հետ զրույցում անհետ կորած զինծառայողներից մեկի մայրը՝ Անահիտ Ադոյանը նշեց, որ զորամասի դիմաց կրակ են վառել և նստել կողքը. «Տեսնենք՝ ինչ կասեն։ Մնալու ենք էստեղ, մինչև մեր էրեխեքը գան։ Մենք միշտ եկել ենք, որ տեսնենք, թե ինչ են մեզ փոխանցում, ինչ պիտի անեն, մենք էլ դրան չենք սպասում, ինչ ուզում են թող անեն, էնքան ենք էստեղ սպասելու, մինչև մեր էրեխեքը գան»։

Տիկին Անահիտը նշեց, որ զորամասից ոչ ոք իրենց չի հանդիպել ու ոչինչ չի ասել. «Երկու օր առաջ քիմիական զորամասի գնդապետ Վարդան Նշանյանը ալկոհոլի ազդեցության տակ եկել էր, սարեր էր խոստանում, ավելորդություններ էր թույլ տալիս, որ հաստատ ինքը էդ հարցը լուծելու է»։