Ղազախստանի առաջին նախագահ Նուրսուլթան Նազարբաևը խոսել է իր անունով տարբեր տեղանուններ անվանակոչելու մասին:

Նա մասնավորապես նշել է, որ նախագահի պաշտոնը զբաղեցնելու ընթացքում դեմ է եղել նման պրակտիկային ու արգելել է դա անել, սակայն նման առաջարկներ եղել են ամեն օր. «Ինչպե՞ս կարելի է ղազախ պոետ Աբայի անվան դպրոցն անվանակոչել իմ անունով: Դա սխալ է»,-ասել է նա:

Միակ բացառությունը եղել է համալսարանը, որը հիմնվել է հենց Նազարբաևի նախաձեռնությամբ:

Նազարբաևը խոսել է նաև երկրի մայրաքաղաքն իր անունով անվանակոչելու մասին. «Անձամբ ինձ դա պետք չէ: Ոմանք, հատկապես՝ ղեկավարները, մտածում են, որ այդկերպ իրենցից հետո հիշողություն կմնա իրենց մասին: Ինձ դա չի հետաքրքրում, ինչ տարբերություն, թե ինչ կմնա»,-նշել է նա:

Նազարբաևի խոսքերով, դեռ կենդանության օրոք հուշարձաններ դնելը խոսում է անվստահության մասին, որ մարդու մասին հիշողություն կմնա մյուս սերունդների մոտ. «Դրա համար ես խնդրել եմ, որ չտարվեն այդ հարցում»: