Եթե ամեն ինչ լավ է, ժողովուրդը ձեզ հետ է, ինչո՞ւ եք ընտրություններ անում, ինչո՞ւ եք խոսում ընտրությունների մասին: Եթե կա խնդիր, ապա այդ խնդիրն ընտրություններով չես լուծի: Ընտրությունները քաղաքական պրոցես են, անհնար է անել մի երկրում քաղաքական ընտրություն, որտեղ չկա քաղաքականություն: Այս մասին ֆեյսբուքյան ուղիղ եթերում հայտարարեց Միքայել Մինասյանը:

«Ընտրություններն ի՞նչ հարց են լուծելու, հողե՞րն են հետ բերելու, ստորագրված փաստաթղթերն են չեղարկելո՞ւ, 5 հազար տղաներին են հետ բերելո՞ւ, ի՞նչ են անելու:

Ես ունեմ հստակ մոտեցում:

Հայաստանում չպետք է լինեն ընտրություններ, մինչև չտրվեն քաղաքական, բարոյական, քրեական գնահատականներ այն գործընթացներին, որոնք տեղի են ունեցել 2018 թվականից հետո, որովհետև դրանք լի են պետական, ազգային դավաճանություններով:

Քաղաքական գործընթացները չեն կարող ուղղակի սկսվել, նախ պետք է երկիրն ազատել քաղաքականությունը սպանողներից, որից հետո պետք է պատժել մեր երեխաներին սպանողներին, պատժել Հայաստանի Հանրապետությունը թալանողներին, երկիրն ազատել գործակալներից, դավաճաններից, անասուններից:

Միայն դրանից հետո, երբ քաղաքականությունը վերածնվելու տեղ ունենա, կսկսվի քաղաքական գործընթաց՝ ընտրություններ, երբ մարդիկ կհասկանան, թե ինչի ու ինչի միջև են ընտրում»: