«Մեզ համար, ընդհանրապես, անցած տարին բավականին ծանր տարի էր՝ ոչ միայն կորոնավիրուսով պայմանավորված, այլև՝ պատերազմով»,- այս մասին այսօր ասուլիսի ժամանակ ասել է «Շտապօգնություն» ՓԲԸ-ի տնօրեն Թագուհի Ստեփանյանը:

«Շտապօգնություն» ՓԲԸ-ի տնօրենն անհրաժեշտ է համարել ընդգծել, որ նոր կորոնավիրուսին վերաբերող կանչերը չեն մերժվել, թեև հակառակ պնդումները կան.

«Կանչը չի մերժվել, ուղղակի որոշ կանչեր, որոնք անհետաձգելի կանչեր չէին, ավելի ուշ են սպասարկվել: Մեզ համար ավելի խնդրահարույց էր այն տարբերակը, որ հիվանդները չէին կարողանում հոսպիտալացվել, հիվանդանոցները գերծանրաբեռնված են եղել: Շտապօգնության բրիգադը տեղ պետք է հասնի մինչև 15 րոպեում, հիվանդի տանը մնա 2 րոպե և որոշի՝ պե՞տք է նրան հիվանդանոց տեղափոխել, թե՞ ոչ: Այդ 20 րոպեն բավականն երկարում էր, որովհետև հիվանդը կարիք ուներ թթվածին շնչելու, վիճակը կայունացնելու, բրիգադը հիվանդի տանը կարող էր մնալ մինչև 2 ժամ»,- ասել է «Շտապօգնություն» ՓԲԸ-ի տնօրենը:

Թագուհի Ստեփանյանը նաև ասել է, որ ծանրաբառնված այս շրջանում բրիգադների թիվն ավելացել է 5-ով, բայց «պիկ կանչերի» ժամին այդ ավելացումն առանձնապես չի օգնել: Սրան գումարած՝ Երևանի «Շտապօգնություն» ՓԲԸ-ն իրականացրել է նաև մարզային կանչեր՝ հիվանդներին տեղափոխելով մարզային հիվանդանոցներ: