Նիկոլ Փաշինյանի կուսակցության խոսնակը վիրավորում է Մոսկվայի հայերին
ՔՊ կուսակցության հասարակայնության հետ կապերի համակարգող Վահագն Ալեքսանյանը ֆեյսբուքյան իր էջում գրել է.
«Առավոտյան նորից աչքովս ընկան մոսկովյան իրենց հայ համարող «քաջերի» մեքենաներն իրենց պաստառներով։
Մտածեցի՝ լավ, որ այս «քաջերը» Հայաստանի վարչապետին են էսպես ուզում դիմավորել, բա տեսնես պատերազմի օրերին ինչե՜ր արած կլինեն։ Դե բնական է, չէի սպասում, որ պիտի գային Հայաստան, ճակատ գնային, թիկունքում գործ անեին, մտածում էի, որ գոնե պիտի մի երկու էսպիսի ավտոերթ էլ Ալիևի, Էրդողանի նկարներով արած լինեն Ադրբեջանի դեսպանատան դիմաց, թեկուզ երկու նույնիսկ երեք անգամ ավելի փոքր պաստառներով, գրեթե չերևացող շրիֆտով ու նույնքան էլ պակաս վիրավորական տեքստերով։
Ման եկա, ման եկա, ման եկա ու դեռ ման եմ գալիս։
Եթե աչքներովդ ընկնի, ուղարկեք խնդրում եմ, չի կարող, չէ՞ պատահել, որ քաջերն այս 44 օրյա պատերազմի ընթացքում ինչ-որ փոքր, նեղ ու մութ տեղ մտած լինեն»։
Ստացվում է, որ Նիկոլ Փաշինյանի կուսակցության խոսնակն իրեն թույլ է տալիս վիրավորել Մոսկվայի հայերին, եթե ոչ բոլորին, ապա՝ ոմանց՝ նրանց անվանելով «քաջ» ու կասկած հայտնելով պատերազմի ժամանակ նրանց ներդրման մասով: Ու սա վերաբերում է նույն այն հայերին, որոնց մասին հայտնի «ծիրանային օպերացիայի» ժամանակ նույն իշխանության ներկայացուցիչները չէին հոգնում խոսել:
