Միլիարդատեր Բիձինա Իվանիշվիլին արժանի քայլ է կատարել՝ հեռանալով քաղաքականությունից, քանի որ վաղուց պետք է  նորմ դարձած լիներ, որ քաղաքականությունը իրավաբանների և սոցիոլոգների համար է: Այս մասին հայտարարել է Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին, գրում է «ՌԻԱ Նովոստի» գործակալությունը:

«Կեցցես:  Ռուս գործարար Միխայիլ Պրոխորովն էլ իր ժամանակին նույնն էր  արել, նա նույնպես ընդմիշտ հեռացավ քաղաքականությունից: Նրանք հասկանում են, որ հասարակական գործունեությունը, որը ոչ մի կերպ կապված չէ ֆինանսների և տնտեսության հետ, իրենց համար չէ: Սա վաղուց արդեն պետք է դառնար նորմ. քաղաքականությունը փաստաբանների և սոցիոլոգների համար է: Մարզիկների, դերասանների, երգիչների, գործարարների կամ գրողների մուտքը քաղաքականություն միշտ էլ լավ չի ընդունվի: Աշխարհում ոչ մի նման բան չկա, երբ գրողները մեկը մյուսի ետևից կուսակցություններ գլխավորեն»,-գրել է Ժիրինովսկին  Telegram-ի իր ալիքում:

«Ուստի միլիարդատեր Իվանիշվիլին արժանի քայլ է կատարել: Այս իմաստով նա օրինակելի է»,-ավելացրել է քաղաքական գործիչը:

Ինչպես ավելի վաղ տեղեկացրել էր Tert.am-ը, Վրաստանի իշխող «Վրացական երազանք» կուսակցության առաջնորդ Բիձինա Իվանիշվիլին նամակի միջոցով հայտարարել է քաղաքականությունից ընդմիշտ հեռանալու մասին: