Փարիզի քաղաքապետ Անն Իդալգոն հաստատել է, որ Ֆրանսիայի մայրաքաղաքի կենտրոնական փողոցի՝ Շանզ Էլիզեյի վերափոխման հավակնոտ ծրագրերը քննարկման վերջնական փուլում են, հաղորդում է CBS-ը։

Քաղաքապետի նախաձեռնության համաձայն՝ Շանզ Էլիզեյում պետք է կրճատվեն երթևեկելի հատվածները, ավելի շատ տարածք հատկացվի հետիոտներին և իրականացվեն կանաչապատման աշխատանքներ։

Նշվում է, որ Շանզ Էլիզեն, որը հաճախ անվանում են «աշխարհի ամենագեղեցիկ պողոտան», արդեն երեք տասնամյակ չի վերանորոգվել, և շատ փարիզեցիներ կարծում են, որ այն «խունացած» տեսք ունի և «կորցրել է իր նրբագեղությունը»։

Ֆրանսիական Le Journal du Dimanche թերթին տված կիրակնօրյա հարցազրույցում Փարիզի քաղաքապետը հաստատել է, որ պողոտայի վերափոխումն իր առաջիկա ծրագրերի մեջ է:

Նրա խոսքով՝ ամբողջ նախագծի բյուջեն կազմում է 305 մլն դոլար, սակայն արմատական փոփոխությունները տեղի չեն ունենա միանգամից։ Իդալգոն հայտնել է, որ նախագծի հաստատման դեպքում այն կվերակառուցվի առաջիկա մի քանի տարում։

Նշվում է, որ Շանզ Էլիզեյի պահպանության հարցերով զբաղվող կոմիտեն պողոտայի և նրա շրջակայքի հիմնանորոգման համար 2018 թվականից արշավ է իրականացնում:

«Լեգենդար պողոտան վերջին 30 տարիների ընթացքում կորցրել է իր շքեղությունը։ Այն աստիճանաբար լքվել է փարիզցիների կողմից և մի քանի ճգնաժամեր տեսել՝ «դեղին բաճկոնների» ցույցեր, գործադուլներ, համաճարակ, տնտեսական ճգնաժամ և այլն», - ասված է կոմիտեի հայտարարության մեջ, որը ողջունել է Իդալգոյի հայտարարությունը: