Զանգելանի հատվածում որոնողական աշխատանքներ կատարելու անհետ կորած զինծառայողների հարազատների պահանջն ի վերջո կատարվել է։ Անհետ կորած զինծառայողներից մեկի մայրը՝ Անահիտ Ադոյանը, «Փաստինֆո»-ի հետ զրույցում ասել է, որ նախօրեին Զանգելանի հատվածում իրականացվել են որոնողական աշխատանքներ, որոնց արդյունքում հայտնաբերվել են հողի տակ թաքցված տղաների մարմինները։

«Այդտեղ է տեղի ունեցել մեր մարտը և մոտ 20 օր առաջ որոնողական աշխատանքներ են տեղի ունեցել՝ տեղանքը գտնելու համար։ Թեև Ադրբեջանը հերքել էր՝ նշելով, որ մենք այդտեղ չունենք մարմիններ, բայց իրենց նկարած տեսանյութերով ողողվել էր համացանցը, Զանգելանի հենց դպրոցի դիմաց զոհեր են ցույց տվել, պահանջել ենք անգամ այդ մարմինները։ Դրանից հետո իրենք ասացին, որ ինչ-որ իրենց գերեզմաններում մեծ փոս է արվել, որտեղ իրենք բոլորին հուղարկավորել, թաքցրել են»,- պատմեց անհետ կորած զինվորի մայրը։