Ոստիկանապետ Վահե Ղազարյանը պատերազմում զոհվածի ոստիկան եղբոր հետ կեղտոտ գործարք է կնքել
«Նոր Հայաստանում» ամեն ժամ նոր կարմիր գծեր են հատվում։ Պատերազմից հետո այլևս բոլոր բարոյական «չի կարելի»-ները ոտնակոխ են արված։ Վկա՝ անհետ կորածի հոր ձերբակալությունը՝ ՊՆ դարպասներին հարվածելու պատճառով։
ARM24.net-ին երկու նման դրվագի մասին է հայտնի դարձել Փաշինյանի զինվոր կնոջ՝ Աննա Հակոբյանի մասնակցությամբ:
Պատերազմի ավարտից հետո Փաշինյանի մտերիմ ընկեր, ոստիկանապետի պաշտոնը զբաղեցրած Վահե Ղազարյանն իր մոտ է կանչել ներքին զորքերի ծառայողներից մեկին ու նրան գործարք առաջարկել։ Ծառայողը պատերազմի զոհերից մեկի եղբայրն է։ Եվ այսպես․ ոստիկանապետ Ղազարյանը, խոստանալով իր աշխատակցին պաշտոնի բարձրացում՝ առաջարկել է թույլ տալ, որ Աննա Հակոբյանը գնա իրենց տուն, և նկարահանումներ արվեն։ Ընտանիքից «հասնում էր» լավ դիմավորել նրանց։ Ծառայողը համաձայնել է։ Նրա անունը, հարգելով զոհվածի եղբայր լինելու հանգամանքը, չենք հրապարակում։
Եվս մեկ այսպիսի պայմանավորված նկարահանում էլ է տեղի ունեցել․ Հակոբյանի հիմնադրամից զանգահարել են զոհերից երկուսի ընտանիքներին և առաջարկել նկարահանել նրանց։ Երկու դեպքում էլ ընտանիքները պահանջել են մարել իրենց վարկերը։ Այս դեպքում ևս «գործարքը» կայացել է՝ բոլոր կողմերի պահանջները բավարարվել են։
Սա ողբերգություն է՝ մեծագույն ողբերգություն, երբ ընտանիքները սկսում են վաճառել իրենց որդիների արյունը։ Մյուս կողմից էլ, հավանաբար, նրանց մեղադրել էլ չի կարելի․ զոհերի, գերիների, անհետ կորածների, վիրավորների հարազատներն անտերության են մատնված։
Նրանց դուռը բացող չկա։
Սուգը կիսող չկա։
Ցավը մեղմող չկա։
Հոգսը թեթևացնող չկա․․․
