Հռոմի պապ Ֆրանցիսկոսը պատվաստվել է կորոնավիրուսի դեմ՝ ամերիկյան Pfizer և գերմանական BioNTech ընկերությունների արտադրած դեղամիջոցով: Այս մասին չորեքշաբթի օրը հաղորդել է արգենտինական La Nacion թերթը՝ վկայակոչելով իր աղբյուրները: Հայտնում է ՏԱՍՍ լրատվական գործակալությունը։

Ինչպես նշում է պարբերականը՝ հովվապետին տրվել է պատվաստանյութի առաջին չափաբաժինը, երկրորդը նա կստանա երեք շաբաթվա ընթացքում:

Վատիկանում Հռոմի պապի պատվաստման մասին տեղեկությունները դեռ պաշտոնապես չեն հաստատվել: Վերջերս տված հարցազրույցում 84-ամյա պապը հայտարարել էր պատվաստվելու իր մտադրության մասին՝ նշելով, որ «յուրաքանչյուրի բարոյական պարտքն է պաշտպանել ուրիշների առողջությունն ու կյանքը»:

Չորեքշաբթի օրը ավելի վաղ Սուրբ Աթոռի մամուլի ծառայության ղեկավար Մատեո Բրունին հայտարարել է, որ Վատիկանում պատվաստումներ են սկսվելու։