ԱԺ-ում աշխատանքների մեկնարկով պայմանավորված՝ միգուցե, թվացյալ պասիվություն կա ԲՀԿ-ի կողմից, բայց դա հենց թվացյալ է, քանի որ, ըստ էության, ԲՀԿ-ի օրակարգում ոչինչ չի փոխվել։

Այս մասին MegaNews.am-ի հետ զրույցի ընթացքում նշեց Աժ ԲՀԿ խմբակցության պատգամավոր Շաքե Իսայանը։ Նա վստահեցրեց՝ ինչպես ԲՀԿ առաջնորդ Գագիկ Ծառուկյանը Նիկոլ Փաշինյանի հետ տարեվերջյան հանդիպման ժամանակ նշեց ԲՀԿ-ի անելիքները, դրանք հենց այդ նախանշված ուղղությամբ էլ ընթանում են։

«Ճիշտ հակառակը, մենք է՛լ ավելի նոր ծրագրեր ու գաղափարներ ունենք, այս օրերին հանդիպումներ ենք ունենում, որպեսզի հասնենք մեր ծրագրերի իրականացմանը, մասնավորապես, Նիկոլ Փաշինյանի հրաժարականի հարցի մասին է խոսքը, ազգային համաձայնության կառավարության ձևավորմանը և այլլ․․․ այսինքն՝ մեր օրակարգում որևէ փոփոխություն չկա», — նշեց Շաքե Իսայանը։

Անդրադառնալով նախկին զինդատախազ Գագիկ Ջհանգիրյանի՝ «Իմ քայլը» խմբակցության կողմից որպես Բարձրագույն դատական խորհրդի անդամի թեկնածու առաջադրվելու փաստին՝ Շաքե Իսայանը նշեց ՝ մինչև այս պահը տվյալ հարցի հետ կապված՝ «Բարգավաճ Հայաստան» խմբակցությունում որևէ քննարկում տեղի չի ունեցել։

«Այդ մասով կկարողանամ հավելյալ ինֆորմացիա տրամադրել այն ժամանակ, երբ կունենանք այդ քննարկումը»․ — նշեց Շաքե Իսայանը։

Խոսելով երեք օր առաջ Մոսկվայում տեղի ունեցած՝ Հայաստանի, Ռուսաստանի և Ադրբեջանի ղեկավարների եռակողմ հանդիպմանը՝ ԱԺ «Բարգավաճ Հայաստան» խմբակցության պատգամավորը նշեց․ «Մենք ի սկզբանե ասել ենք և հիմա էլ շարունակում ենք պնդել, որ ՀՀ շահերը չի կարող ներկայացնել պարտված ղեկավարը, և կարող ենք ասել՝ սա հերթական դիվանագիտական տապալումն էր, հերթական ձախողումը, քանի որ եթե հիշում եք, հենց իշխանությունների կողմից հայտարարվեց, որ ռազմագերիների հարցը առաջնահերթություն է, ավելին՝ ռազմագերիների հարցն իրենք դարձին քաղաքական մանիպուլյացիաների առիթ՝ չազդվելով անգամ մեր հայրենակիցներից, ռազմագերիների ծնողներից, որոնք այս օրերին բարձր էմոցիոնալ ֆոն ունեն, քանի որ իրենց զավակների մասին չեն կարողանում որևէ ինֆորմացիա ունենալ։ Իշխանությունն անգամ այս իրավիճակն օգտագործեց, ապա՝ ընդդիմությանը մեղադրեցին՝ միտինգներ անելու հետ կապված՝ ասելով, թե ընդդիմադիրներն են մեղավոր, որ ռազմագերիների հարցը չի լուծվում և այլն․․․․», — նշեց Շաքե Իսայանը հիշեցնելով, ակնհայտ է՝ թեև բավական տևական ժամանակահատված է, ինչ հանրահավաքներ տեղի չեն ունենում, և ակնհայտ է, որ առանց ամոթի՝ այս իշխանությունը հերթական անգամ խաբեց ՀՀ քաղաքացիներին և ռազմագերիների ծնողներին, որոնք սրտատրոփ սպասում էին իրենց զավակների վերադարձին։

«Միանշանակ հասկանալի է, որ Նիկոլ Փաշինյանը չի կարող այս հարցը լուծել։ Նիկոլ Փաշինյանը ձախողված, պարտված ղեկավար է։ Եվ, եթե անգամ տարանցիկ ճանապարհների, տարբեր կոմունիկացիոն ճանապարհների մասին հայտարարություն է նախապատրաստվում ու անգամ այս փուլում Նիկոլ Փաշինյանը չի կարողանում լուծել ռազմագերիների հարցը, ապա մեզ համար պարզ է՝ նա երբևէ նման հարց չի կարողանալու լուծել՝ չնայած՝ մեր կուսակցության համար հասկանալի է՝ Նիկոլ Փաշինյանը չի կարող որևէ հայանպաստ, ի շատ Հայաստանի՝ որևէ հայտարարություն, պայմանագիր ստորագրել կամ որևէ քայլ կատարել ո՛չ այսօր, ո՛չ վաղը, ո՛չ հետագայում», — եզրափակեց պատգամավոր Շաքե Իսայանը։

Հասմիկ Սարգսյան