Միջէթնիկ հակամարտությունների փորձագետ Նաիրի Հոխիկյանը ֆեյսբուքյան իր էջում գրել է. «Ազիզ Թամոյանը Հայաստանի եզդիների առաջնորդներից էր։ Շատ հաճախ չենք շփվել, բայց ունեինք փոխադարձ հարգանք։ Երբեմն հումորով ասում էր, թե ես մի քիչ էլ եզդի եմ, քանի որ եզդիների բարեկամն եմ։ 
Ազիզ Թամոյանը հարգված մարդ էր ոչ միայն եզդի, այլև հայ ժողովրդի շրջանում, իր մեծ ավանդն էր ունեցել Սպիտակի երկրաշարժից տուժածներին օգնության հարցում, արցախյան առաջին պատերազմում։ 
83 տարեկան հասակում Ազիզ Թամոյանը եզդի կամավորական ջոկատների հետ Արցախ մեկնեց նաև 2020թ․ աշնանը, հանդիպեց Արցախի նախագահի հետ և վստահեցրեց, որ իրենք մինչև վերջ կպայքարեն հայկական հողի համար։ 
2021-ի հունվարի առաջին օրերին մահացավ Ազիզ Թամոյանը։ Նրա մահը սգացին եզդիները, հայերը, Արցախի նախագահ Արայիկ Հարությունյանը ցավակցություն հայտնեց, բայց միայն նա։ 
Ոչ մի պաշտոնական ցավակցություն ՀՀ իշխանության կողմից։ 
Ի տարբերություն շատ հայ պաշտոնյաների, եզդիները դասալիք չեն եղել, թշնամու կրակի տակ կանգնել են և պաշտպանել մեր հողերը, ունեցել մեկ տասնյակ զոհ։ Վաղը, երբ էլի կարիք լինի, եզդիները էլի ոտքի կկանգնեն հանուն հայկական պետականության։ Վստահ եմ, ՀՀ իշխանությունը էլի մարտակոչով եզդիներին էլ կասի, թե սա նաև նրանց հայրենիքն է։ 
Իսկ ձեր մարդկային բնութագի՞րը, հարգելի պաշտոնյաներ։ Գուցե ձեզնից մեկը իրեն նեղություն տա՞ր ներկա լիներ եզդիների առաջնորդի հրաժեշտի արարողություններին, գուցե պաշտոնական ցավակցությո՞ւն ուղարկեիք։ Չէ՞ որ դա ձեր սիրելի պոպուլիզմի մաս կարող էր կազմել»։