Հայաստանի Հանրապետության՝ որպես պետության գոյության, կայունության և զարգացման համար Սյունիքի ունեցած դերը հավելյալ անգամ ընդգծելու, բարձրաձայնելու կարիքն անգամ չկա: Գրում է ԲՀԿ խմբակցության պատգամավոր Շաքե Իսայանը։
Մեզանից դարեր առաջ անգամ ռազմաքաղաքական գործիչները հրաշալի ձևակերպել են Սյունիքի՝ որպես Հայաստանի ողնաշարի, որպես Հայաստանում հայ ազգի ապրելու գլխավոր երաշխիքի բացառիկ նշանակությունը: Սյունիքի բացառիկ ռազմավարական նշանակությունը մեր պետության համար անժխտելի է: 
Գաղտնիք չէ, որ նոյեմբերի 9-ի եռակողմ հայտարարությունից հետո Սյունիքն այլևս ամբողջությամբ սահմանամերձ է: 
Այսօր ես և իմ գործընկերները աշխատանքային այցով Սյունիքի մարզում էինք: Այն, ինչ տեղի է ունենում Սյունիքում այսօր, բացարձակ առնչություն չունի երկրի վարչապետի աթոռը զբաղեցնող անձի այն դժգույն թեզի հետ, թե Արցախը հանձնեցինք, որ Սյունիքի անվտանգությունն  ապահովենք...
Բավական է մեկ անգամ լինել Սյունիքում, տեսնել, թե ինչ է կատարվում այնտեղ, տեսնել, թե ինչպես են GPS-ով Սյունիքից հողակտորներ հանձնվում թշնամուն, տեսնել, թե ինչպես հայտարարվեց, թե կանգնում ենք այնտեղ, որտեղ այդ պահին գտնվում է հայկական բանակի զինվորը, իսկ հետո բանավոր պայմանավորվածությունների հիման վրա մեկ օրում 26կմ տարածք հանձնել թշնամուն, տեսնել, որ սյունեցուն անորոշությունները նորանոր լուրջ մտահոգությունների առաջ է կանգնեցրել,  տեսնել, որ սյունեցուն միայնակ են թողել սահմանամերձի կարգավիճակում, որպեսզի այս  թեզի քաղաքական, ռազմական և բարոյական սնանկությունը իր ողջ «հմայքով» վեր հառնի: 
Ցանկացած պաշտոնյա, ցանկացած պետական չինովնիկ, ով դեմքի լուրջ արտահայտությամբ կճառի, թե Արցախը Սյունիքի համար հանձնեցինք, նրանք տարրական պատկերացում անգամ չունեն պետության անվտանգության, Հայրենիքի  և առհասարակ տարածաշրջանում Հայաստանի անվտանգային երաշխիքների մասին: 
Իսկ եթե պատկերացում ունենալով են ճառում այդ թեզը, ապա դա լրիվ այլ պատմություն է...

Հ.Գ. Սյունիքի սահամանամերձ համայնքներում մեր աշխատանքային այցը կշարունակենք նաև վաղը:

Այցի մանրամասներին կանդրադառնամ առաջիկայում: