Ադրբեջանի նախագահ Իլհամ Ալիևը հեռախոսազրույց է ունեցել իր թուրք գործընկեր Ռեջեփ Թայիփ Էրդողանի հետ, հայտնում է ՏԱՍՍ-ը:

«Պետությունների ղեկավարները քննարկել են Աղդամում ռուս-թուրքական համատեղ մոնիթորինգային կենտրոնի աշխատանքի շուտափույթ մեկնարկը՝ նշելով, որ կենտրոնի գործունեությունը կծառայի երկարատև խաղաղության ապահովման գործին», – ասված է հաղորդագրության մեջ:

Ալիևը Էրդողանին տեղեկացրել է Բաքվի վերահսկողության տակ անցած տարածքներում իրականացվող վերակառուցման աշխատանքների մասին ՝ գոհունակություն հայտնելով այդ գործընթացում թուրքական ընկերությունների ակտիվ մասնակցության համար։

«Թուրքիայի նախագահն ընդգծել է, որ իր երկիրը շարունակելու է աջակցել Ադրբեջանին։ Նախագահ Ալիևը շնորհակալություն է հայտնել դրա համար», – նշվում է հաղորդագրության մեջ:

Թուրքիայի արտգործնախարար Մևլյութ Չավուշօղլուն հունվարի 15-ին հայտարարել էր, որ մոնիթորինգային կենտրոնում ծառայելու են 60-ական զինվորականներ Ռուսաստանից և Թուրքիայից:

Նոյեմբերի 9-ին ՌԴ նախագահ Վլադիմիր Պուտինը, Ադրբեջանի նախագահ Իլհամ Ալիևը և Հայաստանի վարչապետ Նիկոլ Փաշինյանը համատեղ հայտարարություն են ստորագրել Լեռնային Ղարաբաղում ռազմական գործողությունների լիակատար դադարեցման մասին:

Փաստաթղթի համաձայն՝ ադրբեջանական և հայկական կողմերը կանգ են առել գրավյալ դիրքերում, իսկ տարածաշրջանում տեղակայվել են ռուս խաղաղապահներ։ Հրադադարի վերահսկողության ռուս-թուրքական կենտրոնի ստեղծման մասին հուշագիրը ստորագրվել է նոյեմբերի 11-ին ՝ ՌԴ պաշտպանության նախարար Սերգեյ Շոյգուի մասնակցությամբ բանակցությունների արդյունքում: