ԱՄՆ նորընտիր նախագահ Ջո Բայդենը առողջապահության նախարարի օգնականի պաշտոնում առաջադրել է Ռեյչել Լևինի թեկնածությունը, Սենատում հաստատվելու դեպքում նա կդառնա ամերիկյան վարչակազմի պատմության մեջ առաջին տրանսգենդեր անձը: Այս մասին տեղեկացնում է Associated Press-ը:

«Դոկտոր Ռեյչել Լևինը կապահովի կայուն առաջնորդություն և անհրաժեշտ փորձ, որը մեզ պետք է, որպեսզի մարդիկ վերապրեն այս համավարակը»,- ասվում է Բայդենի հայտարարության մեջ:

Ներկայումս Լևինը Փենսիլվանիայի առողջապահության վարչության պետն է: Ինչպես նշում է Washington Post-ը, դաշնային մակարդակի անցնելու դեպքում նա վերահսկելու է Առողջապահության նախարարության առանցքային գերատեսչություններն ու ծրագրերը:

Լևինն ավարտել է Հարվարդի քոլեջը: Նա փոխել է սեռը 2011 թվականին: