ԱԺ-Կառավարություն հարցուպատասխանի ընթացքում «Լուսավոր Հայաստան» խմբակցության պատգամավոր Անի Սամսոնյանը հարց ուղղեց Նիկոլ Փաշինյանին՝ անդրադառնալով գերիների վերադարձի խնդրին։

«Հարգելի՛ պարոն վարչապետ, նոյեմբերի 10-ից հետո, երբ ստորագրված եռակողմ հայտարարությունն արդեն իրողություն էր, Դուք հետևողականորեն իրագործել եք դրա 9 կետերից 7-ը, գործընթացը կանգ է առել 8-րդ և 9-րդ կետերի վրա, որոնից մեկն այսօր Ադրբեջանի պարտավորությունն է։ Այն է՝ պատերազմից հետո Ադրբեջանից վերադարձել բոլոր ռազմագերիներին՝ առանց ձգձգումների և շահարկումների»,-ասաց նա։

Սամսոնյանը նաև հիշեցրեց՝ 9-րդ կետն էլ կոմունիկացիաների ապաշրջափակումն է։ «Այսինքն՝ Ադրբեջանի օրակարգը, որը որքան էլ Դուք ներկայացնեք երկկողմանի շահավետության տեսանկյունից, այդքան էլ այդպես չէ։ Ենթադրենք՝ նոյեմբերի 10-ին ստեղծված իրավիճակը Ձեզ հնարավորություն չի տվել ընտրելու հայտարարության կետերի կատարման հաջորդականությունը, և չեք պատկերացրել, որ Ադրբեջանն օր առ օր կվերցնի Արցախի բոլոր շրջանները, բայց համառորեն չի տա մեր ռազմագերիներին, բայց պատկերն այլ էր արդեն երկու ամիս անց, և Դուք Մոսկվա մեկնելուց առաջ որպես առաջնահերթություն սահմանեցիք գերիների վերադարձը»,-ասաց նա, ապա խնդրեց հաշվի առնելով այդ ամենը՝ պատասխանել, թե ինչու հայկական կողմը, Փաշինյանի գլխավորությամբ, Մոսկվայից վերադարձավ գլխիկոր։

Հարցին Փաշինյանի փոխարեն պատասխանեց ՀՀ փոխվարչապետ Մհեր Գրիգորյանը։

«Նախ՝ 8-րդ կետը կատարման ընթացքում է, և մասնակի կատարվել է։ Երկրորդ՝ 9-րդ կետը կատարման սկզբնական փուլում է, և սխալ կլինի պնդել, որ 9-րդ կետի կատարումը չի նպաստելու 8-րդ կետի կատարմանը։ Ժամանակը ցույց կտա։ Ասել՝ մի կետը կատարվել է, մյուս կետը չի կատարվել, կարծում եմ, սխալ պնդում է»,-ասաց Գրիգորյանը։

Սամսոնյանն արձագանքեց՝ Գրիգորյանը պատգամավորին պատասխանում է ի՞ր ցանկությամբ, թե՞ վարչապետի ցուցումով, քանի որ հարցն ուղղված է եղել վարչապետին։

«Եթե իմ հարցին պատասխանում եք Ձեր ցանկությամբ, ապա Դուք իմ հարցի հասցեատերը չեք։ Եթե հարցիս պատասխանում եք վարչապետի ցուցումով, ապա նշանակում է, որ ինչպես Մոսկվայում վարչապետը չկարողացավ լուծել այդ հարցը, ապա նաև այստեղ՝ ԱԺ-ում, պարզապես ունակ և կարող չէ իմ հարցին տալ պատասխան։ Հետևաբար, խնդրում եմ զբաղեցնել Ձեր տեղը, ես Ձեզ արձագանքելու ոչինչ չունեմ»,-նշեց նա։

Գրիգորյանը պատասխանեց․ «Եթե այդ հարցը տալիս եք, բարի եղեք մնալ այդ հարցի կարևորության շրջանականերում։ Ես ինձ թույլ չեմ տա մեկնաբանել Ձեր երկրորդ ասածը»։