ԱՄՆ Ներկայացուցիչների պալատի անդամ Մարջորի Թեյլոր Գրինն ԱՄՆ նախագահ Ջո Բայդենի դեմ իմպիչմենտթի հոդվածներ է ներկայացրել: Այս մասին քաղաքական գործիչը տեղեկացրել է իր պաշտոնական թվիթերյան միկրոբլոգում հրապարակած տեսանյութում:

«Քիչ առաջ ես Բայդենի դեմ իմպիչմենթի մի քանի հոդված եմ ներկայացրել: Տեսնենք, թե ինչ կստացվի»,- նշել է նա:

Ավելի ուշ կոնգրեսականն իր միկրոբլոգում հայտարարություն էր տարածել, ըստ որի՝ Բայդենը «այն մարդը չէ, որը կարող է զբաղեցնել նախագահի պաշտոնը»:  Բացի այդ, քաղաքական գործիչը նորընտիր նախագահին մեղադրել է Բարաք Օբամայի նախագահության ժամանակ փոխնախագահի պաշտոնում լիազորությունները չարաշահելու, ինչպես նաև իր որդու՝ Հանթերի հետ կապված «բացահայտ նեպոտիզմի» համար:

Հիշեցնենք՝ Գրինն ավելի վաղ հայտնել էր իր մտադրության մասին: Հունվարի 13-ին նա գրառում էր կատարել, որում նշել էր՝ «հպարտ է լինել այն մեկը, որն ունակ է լսելի դարձնել այն հանրապետական ընտրողների ձայնը, որոնք անտեսվել են»: