ՀՀ քննչական կոմիտեի հատկապես կարեւոր գործերի քննության գլխավոր վարչությունում իրականացված բազմակողմանի քննությամբ պարզվել են ՀՀ կառավարությանն առընթեր պետական գույքի կառավարման վարչությունում կատարված չարաշահումների հանգամանքները:

ՔԿ տարածած հաղորդագրության մեջ նաեւ ասվում է. «Քննությամբ ձեռք բերված փաստական տվյալների համաձայն՝ «Անի» ԲԲԸ-ի տնօրենը, նպատակ ունենալով իրենց ընտանիքին պատկանող ԲԲ ընկերության կողմից շահագործվող «Ջրաձոր» ՓՀԷԿ-ի ջրառն ապահովող Ախուրյանի աջափնյա ջրանցքի վրա կատարած ծախսերի միջոցով կրճատել հարկային վճարումների չափերը, ինչպես նաեւ  նշված ՓՀԷԿ-ի կողմից արտադրվող էլեկտրաէներգիայի վաճառքի սակագինը  բարձրացնելու  արդյունքում ավելացնել եկամուտները,  2017թ. փետրվարի 2-ին դիմում է հասցեագրել ՀՀ վարչապետին՝ խնդրել է ՀՀ Շիրակի մարզի Ամասիա համայնքում գտնվող Ախուրյանի աջափնյա ջրանցքի հատվածը՝ 1.882 քմ մակերեսով Ջրաձորի ջրանցքը եւ դրա օգտագործման ու սպասարկման համար անհրաժեշտ 0,968 հա մակերեսով հողամասը, 5.342 քմ մակերեսով Ամասիայի ջրանցքը եւ դրա սպասարկման համար անհրաժեշտ 1,38 հա մակերեսով հողամասը, 7.060 քմ թունելը, ինչպես նաեւ ջրանցքները սպասարկող կառուցվածքներն ուղղակի վաճառքի ձեւով օտարել «Անի» ԲԲ ընկերությանը: Նույն դիմումով խնդրել է վաճառել  Ախուրյանի աջափնյա ջրանցքի մասը կազմող տվյալ հատվածը՝ ներկայացնելով խեղաթյուրված տվյալներ, թե իբր այն ջրամատակարարում է իրականացնելու խոշորացած մեկ համայնքի, հատուկ շեշտադրել է ջրանցքի հատվածի վերակառուցման ու ներդրումների կատարման անհրաժեշտությունը։

Նշված դիմումը, քննարկելու եւ առաջարկություններ ներկայացնելու հանձնարարականով, ուղարկվել է ՀՀ ԿԱ պետական գույքի կառավարման վարչություն, որի կատարման նպատակով նույն վարչության կողմից վերոնշյալ գույքի վերաբերյալ ձեռք են բերվել ելակետային տվյալներ։

Այդ ընթացքում, ի կատարումն ՀՀ վարչապետի հանձնարարականի, ՀՀ  ջրային տնտեսության պետական կոմիտեն 21.02.2017թ. ՀՀ ԿԱ պետական գույքի կառավարման վարչությանը հասցեագրել է գրություն, որով նշված ոռոգման համակարգը  «Անի» ԲԲԸ-ին վաճառելու վերաբերյալ տեղեկացրել է, որ ընկերության գրության մեջ նշված է նաեւ, որ ոռոգման համակարգը վերակառուցելու դեպքում կապահովի այդ տարածաշրջանի 9 համայնքների՝ մոտ 4.700 հա հողատարածքների ջրամատակարարում, ինչի դեպքում այն չի կարող համարվել տեղական նշանակության։

Նշված գույքի շուկայական արժեքը որոշելու նպատակով գնահատման հաշվետվություն կազմելու համար տվյալները տրամադրվել են նույն վարչության կազմում գործող «Պետական գույքի գույքագրման եւ գնահատման գործակալություն» ՊՈԱԿ-ին, որի բաժնի պետը, որակավորված մասնագետների հետ միասին, իրականացրել է գնահատման նախապատրաստական աշխատանքներ, որի արդյունքներով նախնական եզրահանգման են եկել, որ դրա արժեքը կարող է կազմել շուրջ 200.000.000 ՀՀ դրամ, ինչի մասին բաժնի պետը տեղեկացրել է վարչության պետի ժամանակավոր պաշտոնակատարին: Նշված նախապատրաստական աշխատանքներին մասնակցած «Անի» ԲԲԸ-ի տնօրենը, տեղեկանալով նախնական հաշվարկների արդյունքում ստացված գույքի հնարավոր արժեքի մասին, վրդովվել է, սակայն օգտագործելով նշված վարչության պետի ժամանակավոր պաշտոնակատարի ու իր որդու միջեւ առկա փոխհարաբերությունները, վերջինիս միջոցով տվյալ գործընթացը ղեկավարող վարչության պետի պաշտոնակատարին հավաստիացրել ու համոզել է, որ ջրանցքի նշված հատվածը խիստ մաշված է ու գրեթե անպիտան, այնուամենայնիվ իրենք ցանկանում են 30 միլիոն ՀՀ դրամով գնել, ապա՝ վերանորոգել այն եւ ապահովել դրա բնականոն աշխատանքն ու ջրօգտագործողների անխափան ջրամատակարարումը՝ մեծ ներդրումներ կատարելով պետության համար։ ԲԲ ընկերության տնօրենի վերոնշյալ պնդումներից դրդված եւ միաժամանակ գործելով կարիերիզմի շարժառիթով, նպատակ ունենալով ցույց տալ, թե իբր ցածրարժեք գույքի մասով  մեծ՝ 540.000.000 ՀՀ դրամի չափով, ներդրումներ է բերում պետության համար՝ վարչության պետի պաշտոնակատարը, «Անի» ԲԲ ընկերության տնօրենի որդու հետ ունեցած կապերով պայմանավորված անձնական շահագրգռվածությունից ելնելով, իրեն վերապահված լիազորություններն  օգտագործել է ծառայության շահերին հակառակ՝ գնահատման բաժնի պետին բանավոր հանձնարարել է վերոնկարագրյալ գույքի արժեքը նշել «Անի» ԲԲԸ-ի տնօրենի նախընտրած գնին համապատասխան, իրականից խիստ ցածր՝ 30.000.000 ՀՀ դրամ՝ դրդելով կազմել պաշտոնական կեղծ փաստաթուղթ, ինչը, աշխատանքից չազատվելու անձնական դրդումներից ելնելով, բաժնի պետն իրականացրել է, ապա կեղծ փաստաթուղթն անձամբ ներկայացրել է վարչության պետի պաշտոնակատարին՝ կրկին անգամ պարզաբանելով դրա ոչ իրական լինելու հանգամանքը, սակայն վերջինս, անտեսելով այդ, հաշվի չառնելով պետական նշանակության տվյալ ջրային համակարգի օտարման համար օրենքով սահմանված արգելքը, կատարված կեղծ հաշվարկն ուղարկել է նույն վարչության կազմում գործող տնօրինման վարչություն։ Տվյալ վարչության պետը, ինչպես նաեւ նույն գործընթացով զբաղվող օտարման բաժնի պետն ու կատարող՝ գլխավոր մասնագետը, անբարեխիղճ վերաբերմունք են դրսեւորել իրենց ծառայողական պարտականությունների նկատմամբ՝  որեւէ իրավասու մարմնի գրավոր հարցում չեն կատարել՝ պարզելու նշված ջրանցքի հատվածի կողմից ոռոգվող համայնքների քանակը, դրա արդյունքում` տեղական նշանակության ջրային համակարգ հանդիսանալու կամ չհանդիսանալու եւ օտարման համար օրենսդրությամբ նախատեսված խոչընդոտների առկայության վերաբերյալ, պատշաճ ուշադրության չեն արժանացրել ու չեն քննարկել այդ հանգամանքի մասին նախազգուշացնող ՀՀ ԷԵԲՊՆ ջրային տնտեսության պետական կոմիտեի հիշյալ գրությունը, ձեռք բերված փաստաթղթային հիմքերում չունենալով նաեւ օրենսդրությամբ սահմանված ձեւին համապատասխան գնահատման հաշվետվություն՝ կազմել ու վարչության պետի պաշտոնակատարին են ներկայացրել ՀՀ կառավարության թիվ 372-Ա որոշման նախագիծը։

Վերջինս նշված նախագիծն ուղարկել է ՀՀ կառավարություն՝ կցելով տեղեկանքներ այն մասին, թե տվյալ որոշման նախագծի ընդունումն այլ իրավական ակտերում փոփոխություններ եւ լրացումներ կատարելու անհրաժեշտություն չի առաջացնի, նախատեսվում է պետական բյուջեի եկամուտների ավելացում, հղում է կատարվել «Անի» ԲԲԸ-ի գրության նշումներին այն մասին, որ ջրանցքի նշված հատվածը սպասարկում է մեկ համայնք եւ այն կարող է սահմանված կարգով օտարվել, նշվել է նաեւ, թե ՀՀ ջրային տնտեսության պետական կոմիտեն տվել է իր համաձայնությունը նշված գույքի օտարման վերաբերյալ ու ներկայացրել գնահատման համար անհրաժեշտ ելակետային տվյալների փաթեթը, սակայն որեւէ անդրադարձ չի կատարվել նույն կոմիտեի գրության այն դրույթներին, որում նշվել են նաեւ օտարման արգելքների մասին։

Արդյունքում ՀՀ կառավարության՝ 13.04.2017թ. թիվ 372-Ա որոշմամբ թույլատրվել է 615.860.000 ՀՀ դրամ իրական արժեք ունեցող գույքն ուղղակի վաճառքի ձեւով, ընդամենը  22.695.306 ՀՀ դրամով, օտարել  «Անի» ԲԲԸ-ին։ 2017թ. մայիսի 2-ին պետական ռազմավարական նշանակություն ունեցող հիդրոկառույցի նկատմամբ գրանցվել է ԲԲԸ-ի սեփականության իրավունքը, ինչի հետեւանքով պետության օրինական շահերին պատճառվել է 439.199.694 ՀՀ դրամի գույքային վնաս՝ առաջացնելով ծանր հետեւանքներ:

Ձեռք բերված բավարար ապացույցների համակցությամբ՝ ՀՀ ԿԱ պետական գույքի կառավարման վարչության պետի պաշտոնակատարին մեղադրանք է առաջադրվել՝ ՀՀ քրեական օրենսգրքի 308-րդ հոդվածի 2-րդ մասով եւ 38-314-րդ հոդվածի 1-ին մասով, ԲԲԸ-ի տնօրենին՝ ՀՀ քրեական օրենսգրքի 38-308-րդ հոդվածի 2-րդ մասով եւ 38-38-314-րդ հոդվածի 1-ին մասով, ՀՀ ԿԱ պետական գույքի կառավարման վարչության պետական գույքի տնօրինման վարչության պետին եւ նույն վարչության օտարման բաժնի պետին ՝ ՀՀ քրեական օրենսգրքի 315-րդ հոդվածի 2-րդ մասով։

Նախաքննության ընթացքում որոշում է կայացվել գնահատման բաժնի պետի նկատմամբ քրեական հետապնդում չիրականացնելու մասին՝ ոչ արդարացնող՝ համաներման հիմքով։

Նախաքննությունն ավարտվել է, եւ քրեական գործը՝ մեղադրական եզրակացությամբ, ուղարկվել դատախազին: